周柏豪分裂 獨處變臉
被封做新一代型男歌手的周柏豪，外表看似好花弗，但他竟以「宅男」自居，如同每個人總有分裂兩面體，他親揭自己黑暗的一面，個性悲觀的他對人歡笑背人愁！
出道4年的周柏豪一直努力唱歌及拍戲，但受外形拖累，大家總是忽略了他的工作，將注意力全放在他的緋聞上，柏豪從不否認緋聞令其知名度提高，但緋聞帶來個後果好嚴重，他說：「人哋只係記住自己嘅緋聞，未必知你唱過乜歌，所以呢樣要認真考慮，究意係咩一回事，我好清楚入行做乜，唔係搞呢樣搞嗰樣，所以我唔會理咁多緋聞，我知會陸續有來，但我會調節自己，（係咪好難洗底？）唔使洗，時間會淡忘一切，選擇得入呢行就要受呢樣。」
對煙敏感冇得蒲
外表看似花弗的柏豪笑言自己多情，但不花心，在感情路上他從未試過背叛另一半，從不會夜蒲的他「獵食」機會都少，他說：「因為我超級敏感，唔聞得煙味，所以我唔會去夜蒲。」他更自爆是「宅男」大悶蛋一名，他說：「做完嘢都係返屋企。」
猶如小丑背人愁
正如今次柏豪新碟《本體分裂》的概念，帶出每個人都有分裂的兩面體，他說：「對住人好開心會笑同多說話，但夜晚望住塊鏡又係另一個自己，呢啲唔係假，係另一個自己。」就像碟內新歌《黑》，是講述人的黑暗面，也是悲觀的他的另一面，就好像小丑一樣：「對人歡笑背人愁，但又唔會令人驚令人怕嘅感覺。」
文：音樂組