霆鋒未見兩子41日痛入心
鋒芝婚變風波爆出後，栢芝行蹤成謎。先後傳出飛赴吉隆坡搵老公謝霆鋒箍煲，之後又有指她飛加拿大探家人、意大利米蘭Shopping。不過謎底昨晚揭盅，於晚上11時許，栢芝一行五人現身機場，12名保安築起人牆保護，場面混亂，栢芝一直無回答記者是否離婚的提問。此外，足足有41日冇見過兩子的霆鋒，時刻掛念一對寶貝兒子。
栢芝昨晚戴帽、黑超及聽着headphone，在12名保安重重包圍下現身機場，栢芝與豪龍兩姊弟，經理人Emily、女助手及化妝師共五人，由保安開路以15秒速閃入T2閘口，但現場未見栢芝兩個寶貝仔Lucas和Quintus。記者問栢芝是否和謝霆鋒離婚？她只笑而不語，並用手掩嘴笑。據知，栢芝昨晚乘坐CX289的班機，是飛往德國法蘭克福。而栢芝經理人透露栢芝此行是去工作。
連月來身在吉隆坡拍《逆戰》宣傳片的霆鋒，於上月12日Quintus的一歲生日，特別向劇組請假做「空中飛人」，頻撲返港為細仔慶祝，兼陪大囝Lucas享受父子樂，惟自爆出鋒芝婚變後，霆鋒一直在吉隆坡忙於拍戲，由於有連場危險戲份，霆鋒為免分心發生意外，一直忍受憶子之苦，至昨天已有41日冇見過一對乖仔。
努力度期親子
霆鋒將於大後天（26日）現身北京出席電影《財神客棧》宣傳，據知由於他極度掛念一對心肝寶貝，加上有消息指狄拉波已於周一由新加坡返港，兩母子希望能聚首見Lucas和Quintus，偏偏《逆戰》卻趕拍得如火如荼，25日凌晨飛北京的他，26日出席活動，27日一早就飛返吉隆坡開工，左度右度都攝唔到時間返港探囝囝，令霆鋒十分痛心！
否認碌老公卡
有傳栢芝用霆鋒的附屬信用卡狂碌20多萬，包括兩母子頭等機票、弟弟張豪龍和女友及經理人的商務機位，一齊去旅遊歎世界，本報致電栢芝經理人Emily求證，她說：「栢芝根本冇附屬卡，佢碌嘅全部都係自己賺返嚟嘅錢，用自己張卡，呢種說法好荒謬。」而霆鋒經理人霍汶希唔回應。
文：音樂組