嘉穎筍盤王 杏兒流口水
鄭嘉穎和胡杏兒在新劇中由鬥氣冤家變情侶，戲裏戲外互相欣賞，杏兒表示開工過程中發掘嘉穎好多優點，推許對方是城中筍盤王，更不諱言想與他傳緋聞。
無綫新劇《怒火街頭》男女主角鄭嘉穎和胡杏兒雖然並非第一次合作，但承認今次特別有火花，杏兒解釋：「之前合作過《舞動奇跡2 》同《烈火雄心3》，可能《烈》劇角色較內斂，撞出嚟冇咁嘭嘭聲；反而嘉穎今次嘅角色可以玩嘢啲，突破以往官仔骨骨形象，不拘小節兼爛撻撻，其實都係做番佢自己。」
香艷通屋走
杏兒大讚嘉穎是城中筍盤王，她笑說：「其實無綫唔止陳豪一個，嘉穎都好筍！我都希望同佢傳吓緋聞。」嘉穎即「回敬」說：「我只係普通王老五，到依家仲未搵到女友。雖然杏兒都係好女仔，演戲有天分，可惜心有所屬unavailable呢，哈哈。」
二人在劇中有幾場親熱戲，杏兒坦言有點尷尬，她說：「我最怕拍親熱戲，加上同佢好熟，好彩大家有溝通，一、兩take就搞掂。」反而嘉穎沒有所謂：「其中一場都幾激，但拍之前對好晒位，埋位時唔可以有加多減少，唔係會令個女仔好驚。」
嘉穎在劇中有不少大膽演出，露完股隙又要圍毛巾通屋走，十分香艷。
冇諗攞視帝
對於新劇有好成績，杏兒不敢居功，她說：「其實觀眾口味好難估，可能觀眾鍾意我哋鬥吓嘴，同節奏明快嘅劇集。」嘉穎則未想過爭視帝，他說：「以前都攞過，劇集口碑勝過一切。」
文：專案組
攝：吳文聰
服裝及場地：agnes b.