Rosemary Jocelyn「處女」扒龍舟冇得鬥
混血名模Rosemary與Jocelyn昨日獻出人生第一次，首次參加一年一度的龍舟競賽，Rosemary笑言扒完龍舟後，自覺成為真正的香港人，由於Rosemary與Jocelyn代表不同隊伍及參加不同的賽事，故未能在海上鬥一番。
昨日是端午節，本地的混血女模也來扒龍舟應節，參加赤柱舉行的國際龍舟錦標賽。Rosemary坦言因為隊中多女將，故此排名不高，但自問已做出好表現，她說﹕「今次係我第一次扒龍舟，之前同男友練咗四次，扒龍舟真係唔容易，要好進取，而且只係用一邊身體，所以要好好平衡。（媽咪有冇嚟打氣﹖）冇，因為太曬，佢嘅皮膚受唔住。」她稱參與過龍舟比賽，令她覺得自己變成香港人。另外，她又透露下星期將到新加坡三個月拍戲及唱歌，令她十分期待。
練習周身傷
至於「翻版關之琳」Jocelyn與丈夫Anthony、Cara G.男友Jesper以及第三代Canon女Melanie Z.組隊，各人均屬第一次參賽，結果他們在12隊參賽隊伍中以第五名衝線，成績不俗。Jocelyn表示他們今次是為Moonlight基金籌款，她說﹕「善款要視乎成績而定，不過至少都有五萬蚊。」她稱為比賽練習了五次，問到練習時有否受傷﹖她坦言﹕「我雙手同臀部都好痛，仲撞瘀咗條腰。」
望生夠兩個
Anthony則認為扒龍舟十分好玩，他笑言﹕「我覺得自己好似完成咗個心願咁，覺得係死前要做嘅事之一。（仲有咩事喺死前一定要做﹖）同Jocelyn生兩個小朋友。」至於Jesper就稱死前要同Cara結婚。
文：名人組