我係紫荊俠會玩乜look 何倍倩反串行善
香港出現一位派錢濟貧的紫荊女俠，每次出現她都會以紫色面罩配低胸夜行衣騷胸示人，出位的裝扮掀起話題。若你是女俠，會以怎樣的造型出現？汪圓圓希望扮「功夫熊貓」、模特兒何紫綸要扮白雪公主、陳樂榣則扮鬆弛熊，大sell可愛；而恒生新抱何倍倩講笑要女扮男裝，扮成紫荊俠的「男拍檔」，情侶檔孖咇行善。
Zensation新店開幕
何倍倩：「我覺得佢個造型好有心思，如果畀我扮佢，我想做佢嘅拍檔，因為佢要派錢派食品，要拎住好多嘢，着裙一定唔方便，我會扮佢嘅男伴，變男版紫荊俠，同樣戴紫色面具，但着踢死兔，襯番佢嘅高貴形象，以情侶檔去幫人。我對佢印象好深刻，佢可以令社會人士反思，以往做慈善嘅模式，大家都睇慣咗，紫荊俠用呢個形式去幫人，令人注意到原來香港有好多低收入人士需要幫助。」
林夏薇（林峯堂妹）：「如果由我設計，我想個裝扮用流星做主題，因為流星嚟得快，去得又快，睇見流星會帶畀人願望，就好似女俠每次出現都迅雷不及掩耳，而每次出現都畀到窮人快樂及新希望。」
《歡樂時光》首映
何紫綸：「如果唔使蒙面嘅話，我想扮白雪公主，白雪公主令人感覺好純潔、好親切，好似天使咁。我做白雪公主女俠，只會派錢畀冇能力工作嘅人，唔會周街派。」
陳樂榣：「想扮所有小朋友都鍾意嘅鬆弛熊，因為我好鍾意呢隻熊仔，外形好得意，相信扮成咁去派錢，最低限度唔會嚇親人。」
童愛藝術＠海港城活動
琦琦：「我想扮好似電影《黑俠梭羅》裏面嘅梭羅（Zorro），佢戴住黑帽、黑面具、着黑衫，我想做女版Zorro，中性啲、有型啲，學佢咁騎住馬去救人，最想幫助老人家同小朋友。」
MC Jin：「我想扮耶穌造型，抱住耶穌的慈悲心，去宣揚佢對大家嘅愛，就算世人都離棄佢，佢都唔放棄任何人。」
Discovery Learning Academy開幕派對
汪圓圓：「覺得佢好有型，如果係我，我會着一套白色功夫衫，用真面目示人，因為覺得冇必要蒙面。同埋我唔單止幫助香港人或者窮人，世界上有好多不幸嘅人，如果有能力嘅話，我想幫助世界上有需要嘅人。」
楊婉儀：「呢位女士所做嘅嘢好有意思，畀我唔會蒙面，會用自己嘅身份去做慈善。好似我嘅教育中心，會幫一啲無錢參加活動嘅同學，資助佢哋有機會去學習，喺教育上幫助人等同做慈善。」
