祥譚互寸青澀糗事
林子祥（阿Lam）和譚詠麟（阿倫）縱橫樂壇逾三十年，地位舉足輕重，是次兩人應邀受訪，原以為溫馨的緬懷過去，阿Lam首先大爆阿倫在全球直播鏡頭面前出醜，阿倫則寸阿Lam開騷玩低調，竟呼籲「Lam迷」不要捧場！雙方互爆互寸，令現場笑聲不絕！
倫 = 譚詠麟 林 = 林子祥
卅多年前初相識
倫：咁燶嘅你？去邊個「多士爐」度假？哈哈，其實阿Lam同第二啲人好少咁開朗，係熟人先放得開。
林：乜我哋好熟咩？哈哈……我都唔記得我哋喺邊度識？
倫：喺酒吧囉！嗰時去聽你唱歌嘛，你當時冇鬚、長頭髮，皮膚冇咁黑，嗰時係「白人」，依家直情搽咗鞋油上身咁。
林：當年我哋喺黃竹坑一個錄音室錄音，我見到你呢個o靚仔坐喺櫈度等人，啱啱太陽曬入嚟，好似瞌緊眼瞓，嗰時覺得呢條友好靚仔、幾好喎，嗰時係七幾年。
倫：我哋都係玩Band，後來都喺七幾年尾合作呀！當時我拍緊《青春熱潮》，九日半冇返屋企瞓，但一日畀我瞓四個鐘就夠。
林：你四個鐘，我五個鐘，咁你日瞓定夜瞓？
倫：冇所謂，有波睇就夜啲，冇波睇就早瞓，但十二點前瞓就慘啲，晨早就會起身，惟有去餵魚！
林：講番合作嘅人，除咗同我合作仲有冇邊個當年令你印象深刻？
倫：除咗我同你唱歌，嗰時DoDo（鄭裕玲）都有唱歌，但畀人代唱，唔知邊個代佢，係有把女聲代佢唱，佢（DoDo）有試過唱，但後來制止咗，哈哈……
林：咁有記性，記唔記得拍鄧麗君特輯？
倫：最近有睇番喎。記得我唱《愛人女神》咋，你就唔知唱咩歌囉！
林：你又睇番啲舊嘢，咁咪好恐怖？
倫：有幾恐怖呀？嗰時好辛苦，一星期錄三集，起碼每集唱七、八隻歌，有啲歌識唱又有啲唔識唱，嗰時又冇大字報又冇大螢幕，要夾硬記歌詞架。
烏龍撞板記
林：又記唔記得你1997年嗰次又撞板呢？
倫：係咪回歸嗰次？呢件事係非常非常好笑！嗰時97香港回歸中國，有個好大儀式，我哋之前嗰日綵排好晒有埋走位，嗰日早上5點前出發，6點去到化好晒妝等10點嘅儀式，我嘅恐懼症就係由嗰時開始……
林：點解呢？
倫：因為我唔等得，一等就懵吓懵吓，呆坐咗五個鐘後正式開始，本來排好晒位，鏡頭會take我大頭，音樂一起就喺中間出嚟。點知行到出嚟唔記得轉左定右，想問人又唔得，點知真係轉錯，啲人龍喺前面舞緊，我一係捐過，一係檻過，但太高檻唔到要兜路，咁啱黎明喺最左手邊，佢問我「咦？譚生點解你喺度？」我話我點知呀！當時全世界直播緊，後尾睇番錄影，我唱緊時係影緊個舞蹈員，真係好好笑！
林：你啲烏龍嘢真係好好笑！
神龍見首不見尾
倫：你今日任務係講番以前啲嘢呀？老老實實，你幾多號開騷？
林：六月，我唔想人知，哈哈！
倫：有冇搞錯……咁大家唔好去睇！
林：我做親啲嘢都唔想人知。
倫：今次沙麗（葉蒨文）會唔會做嘉賓？
林：唔知佢唱唔唱，到時先算，佢鍾意喺控制台。
倫：你咪對住佢唱「零時十分，Honey佢門外跌親」。
林：嗰時佢唱呢首歌先辛苦，一隻中文字都唔識，到依家都係唔識，要寫埋英文。
倫：所以建立深厚感情？
林：係……到依家都要指住佢唱架！其實以前我讀法文，算係半個鬼佬啦，我都係睇歌詞學。
倫：你直情鬼佬啦，口味都鍾意西餐！講開又講，我記得以前同你拍嘢，你成日匿喺架車度，以為你唔鍾意同人講嘢，點知你成日有千言萬語同我講，見到我就咁開心！所以見親你我都會叫你，有次搭船撞到，見你鬼鬼祟祟戴住頂帽頭耷耷，我特登行去後面叫你！
林：去到邊都撞到你。
倫：你同許冠文好似，你兩個都係神龍見首不見尾，去親大型飲宴，永遠見到嚟唔知幾時走，可能打完招呼已經走咗。
大鬥普通話
倫：我記得有一年太辛苦，可能你都唔記得，我拍緊《天虹》又拍緊《青春熱潮》，出外景時太陽啱啱升起，我用垃圾桶遮太陽，你拍完就走埋嚟叫醒我，仲話「仲唔走呀？點解啲蒼蠅喺鼻哥窿飛嚟飛去，流晒口水都唔醒？」記唔記得先？
林：哈哈……攰到咁，有啲印象。
倫：講吓你演唱會唱咩歌啦？你好多金曲！
林：至少唱五十幾隻歌……
倫：（插嘴）有次我唱普通話歌，你一聽到就話「咦……咁核突架！」嗰時啲普通話唔得嘛！
林：我媽咪係滿洲人，佢喺北京長大，所以我由細聽（普通話）到大。
（突然兩人鬥講普通話，下刪過百字）
唱足35年經典
林：唔知點解大陸淨係記得我哋啲歌，係咪我哋上大陸早？
倫：哥哥（張國榮）囉、羅文都有，不過阿梅（梅艷芳）都少，我喺廣州睇過哥哥演唱會，探過佢班，Danny仔（陳百強）都有，但唔多……佢哋成班好嘥，如果今時今日仲喺度，有好多歌迷等緊佢哋唱Live！我喺八十年代已經上去，依家三、四十歲全部聽我哋歌大，你嗰啲《在水中央》喺卡拉OK仲唱緊。
林：所以今次由1976年第一隻廣東碟一路唱落嚟，唱到2011年。
後記
這對認識逾卅年的老朋友情誼深厚，沉默寡言的阿Lam甫坐下即被風趣幽默的阿倫逗得咯咯大笑，就連阿倫亦忍不住反問在場工作人員：「係咪未見過阿Lam笑得咁開心？佢見親我都係咁！」阿倫亦自言「笑到眼淚水出晒」，阿Lam則總結是次專訪「好似笑多過講嘢」。細心的阿倫心知「講說話」是阿Lam弱點，故訪問途中多次主動牽引，令阿Lam得以開懷地暢所欲言，果然是老友！
採訪：倪小珊
攝影：鄭家俊
場地：洲際酒店