陳慧琳：唔想鋒芝分開
陳慧琳（Kelly）和老公向來恩愛，對謝霆鋒和張栢芝傳出離婚，Kelly指夫妻間難免有拗撬，直言不想鋒芝分開，她更公開夫婦間的財政狀況，坦言老公大方負責擔起頭家，自己名副其實是賺錢買花戴！
前晚Kelly於演藝學院出席Salvatore Ferragamo及施華洛世奇元素合辦的時裝展，Kelly獲品牌厚愛成為首位亞洲女性以2011年秋冬新裝、價值超過五萬元的連身裙示人。Kelly被問到近日鋒芝傳婚變，她說：「希望唔好離婚，兩公婆一定有拗撬，好快就冇事。（傳涉及錢銀問題？）當事人都冇出嚟講，唔方便評論，佢哋依家專心拍戲做好手頭上嘅嘢，都好嘅，畀佢哋冷靜吓。」
嘈完老公會氹番
Kelly向來夫妻恩愛，但她承認試過和老公Alex吵架，不過未至於鬧至想要離婚：「唔睬一日就會有。（佢氹番你？）佢好大方會氹我，我都算易氹。（買咩氹你？）佢買親都唔掂，最經典係買咗個好似硬盒嘅背囊畀我，仲話名模仙蒂歌羅馥都用，真係信佢都傻，佢覺得型，但結果我冇用過。」
唔興簽婚前協議
與Alex會否有婚前協議？Kelly說：「我哋唔興，我哋唔係好有水。（你哋經濟獨立或有錢一齊使？）唔獨立o架，多數男仔大方啲，佢負責交租畀家用，我自己賺錢買花戴，唔使畀家用。（聯名置業？）仲未一齊置業，樓市太高買唔起，就算買多數係聯名，結果咪又係畀個仔！」開始慢慢恢復工作的Kelly，笑言很hea，有別以前工作一單接一單，在家湊仔的她指手足口病正肆虐，不讓兒子上課：「唔敢畀佢返住，次次返親都惹病，依家自己教住先，佢識晒啲字母同數字。」
文：名人組