霆鋒笑住開工：我唔會畀佢嚟

霆鋒、栢芝被爆半年前已有婚變危機，最致命是栢芝自以為先發制人，以離婚作要脅，令霆鋒扯火企硬。面對老公不聞不問，栢芝反而方寸大亂，繼而密謀日內親攜兩子飛到馬國認錯箍煲。連日來各方民意都偏向霆鋒一方，令栢芝形象一再受挫，佔盡上風的霆鋒露出難得的笑臉。

凌空做sit up

慘遭家事困擾的霆鋒，依然專業地投入電影《逆戰》的拍攝工作。休息兩日的他，昨晨九時跟周杰倫出發到距離一小時車程的郊區拍攝。穿上黑色背心灰褲的霆鋒露出右手臂的假紋身，電影公司派出四個大漢為霆鋒護駕，由於天氣炎熱，見他不時以紙巾抹汗，每拍完一個鏡頭，他都會上化妝車休息透涼。

據身邊人透露，霆鋒經過兩日閉關，除了打遊戲機減壓，也靜心地想通想透，心裏已有清楚決定，整個人亦放鬆，所以昨日見他心情明顯有變，終破天荒展露笑容。現場搭建了一個巨型鐵架，他與周董爬上鐵架頂，兩人有講有笑，期間周董邊跟霆鋒說話，更向傳媒手指指，霆鋒即大笑起來，一掃連日來眉頭深鎖的鬱悶。心情大好的他更當眾在鐵架上大玩高難度動作，僅用雙腳支撐凌空做sit up，之後凌空瀟灑跳落地。兩人像馬騮仔般在鐵架上爬來爬去，工作人員則在地下掟飲料給他們解渴。

狀態大勇的霆鋒在另一場口，換上厚身外套雙手被扣孖葉，嘴角有傷，額頭貼上膠布，跟另一演員吳嘉龍對戲。至下午四時收工，霆鋒即登車離去，於傍晚時分返抵下榻酒店由秘道上房。

盛傳栢芝將攜子到馬國向霆鋒負荊請罪箍煲，據知劇組連日來都嚴陣以待，甚至曾開口問霆鋒，但霆鋒卻向工作人員大派定心丸說：「放心，我唔會畀佢過嚟！」霆鋒經理人霍汶希表示無聽過栢芝到當地，霆鋒助手表哥也表示不知情，不過據知英皇以防萬一，或會派人飛到吉隆坡給霆鋒護駕迎戰。

霆鋒僅用雙腳支撐凌空做sit up，反觀周杰倫坐着不動。	心情勁靚的霆鋒chok晒甫士「回眸一笑」，肯定冧死女粉絲。	換上厚身外套的霆鋒雙手被扣孖葉。

表哥回應冇爆粗

另外，之前栢芝被爆為全權控制老公，盡擸霆鋒物業，甚至傳出栢芝在兩人的聯名銀行戶口提取一億二千多萬現金買世紀大廈，栢芝經理人不作回應。昨日亦有馬來西亞報道指栢芝曾致電霆鋒助手「表哥」，但仍無法與老公霆鋒取得聯絡，更盛傳霆鋒在電話內向栢芝爆粗。昨晚表哥回應：「當然冇啦！都冇傾過偈，點爆粗呀？」