熊黛林反教白歆惠發姣
台灣名模白歆惠昨日與「城嫂」熊黛林（Lynn）同場，兩人鬥靚鬥Chok鬥擺性感甫士，以Deep V裙上陣晒咪露長腿的白歆惠，輕易撼低只露左邊香肩的「城嫂」，難得Lynn毫不介意，更大方稱讚對方樣靚身材正。
港台兩地名模「城嫂」Lynn及白歆惠昨日齊為Estee Lauder活動擔任嘉賓，穿上Deep V裙的白歆惠大騷事業線晒咪兼騷長腿，成為全場性感之冠，當兩人站在一起時，白歆惠又不經意地把胸前的雙臂輕輕一夾，事業線頓時更見深長。
唔敢隨便買嘢飲
相反，穿上泰山裝的Lynn明顯比較密實，只露出左邊香肩的她難免失色。問到白歆惠晒咪贏盡全場，她說：「我很害羞，不要這樣說，其實衣服是大會安排的，我是到現場才知道如此性感。（你性感過Lynn喎？）她有教我說廣東話的『姣』字。（為甚麼教這個字？）剛才和Lynn行騷時，她的同事跟她拍了照，Lynn看完後說『哎呀，好姣』。（姣字有負面意思。）是嗎？我還以為是漂亮的意思。」對於近日台灣飲品含塑化劑事件，她說：「政府現在很嚴格控制處理，可是我已不太隨便在街上買飲品，要看見鮮榨才敢喝。」
返南京慶父親節
Lynn被問到教白歆惠講「姣」字時說：「頭先要表現到好Sexy，我見到啲相有感而發啫。我講嘅姣係夠唔夠性感嘅意思。（佢性感過你，搶晒風頭？）我同佢係朋友，朋友之間唔會諗呢啲，佢不嬲好身材，咁多年都係，好靚。（你哋邊個靚啲？）各有優點。（城城有冇話過你姣？）耶，呢個字限於我廣東話唔好攞嚟講吓笑，唔係認真。我喺影相時放啲，平時好保守。」她又透露稍後會返南京跟父親慶祝父親節，但就不會送個女婿給父親當禮物。至於城城可會是個好父親，她即說：「我唔知，等佢做咗爹哋我先知。（你係媽咪？）我唔知呀。」
文：名人組