傅穎打不死以蛻為進
在演藝事業上經歷高高低低的傅穎（Theresa），自信心亦隨之反覆跌蕩，她明白要在圈中掙扎求存，絕不能輕易放棄。深信物極必反的她，認為要不斷蛻變，人才會學懂成長。
入行初期 毫無自信
入行十年的Theresa，起初對自己外貌毫無信心，從無想過當偶像派，就算正式加入女子組合Cookies時，她亦堅持走性格路線，對化妝、衣着亦不會講究。
由十七歲做兼職模特兒，不經不覺入行十年。仲記得當日去模特兒公司面試，我唔覺得自己靚女，而係覺得Model都係「高瘦平」，自己應該可以。仲記得接拍嘅第一個衞生巾廣告有一萬蚊人工，以一個學生嚟講好開心，係我人生第一份儲蓄。當時完全冇諗過會做歌手藝人，直至模特兒公司叫我到K房casting，等消息後正式加盟EMI成為女子組合Cookies成員。
當時我哋Cookies九個女仔，我好冇自信（扁嘴搖頭），根本唔覺得自己係靚女。我係一個唔貪靚嘅人，唔會點理個妝、着乜衫，好男仔頭！當時我覺得Miki（楊愛瑾）最靚，佢啲牙又白又齊笑得好靚，對眼又夠大水汪汪咁，佢呢啲真係靚女！我覺得夠圓嘅女仔特別靚，我本身咁瘦太尖，所以從來唔覺得自己靚女，係要行性格。圈中我覺得台星徐若瑄好靚，佢真係魔鬼天使。我去到05、06年先開始求變，開始注重打扮。
改變形象 是非不斷
脫胎換骨後的Theresa，一把又長又攣的金髮成為她的標誌，以日本娃娃look一躍成為宅男女神，但是非新聞也隨之而來……
喺呢行日子愈耐，自信亦隨之而高高低低。當事業順利嘅時候，對自己嘅自信會增多，當處於低潮時，自信亦不期然減低。但就算自信心幾低，做呢行都唔能夠畀人覺得你冇自信！無論入面係點自己知，但行出嚟就要令人哋覺得你有自信，尤其係處女座嘅我永遠唔會覺得自己係完美，但會好叻扮到自己好有自信。
呢十年我經歷過好多高高低低，05、06年Cookies拆夥後，因為冇乜工作好迷惘，變得好懷疑自己！因為當時乜都冇，由零開始，點博都得，所以先改形象博一鋪，結果寫真集反應好好，事業去到新階段，但到咗09年再次受挫，當時心情更壞，因為已經有少少成績，又有唱片，受挫當然係痛啲，嗰段時間都幾難捱，又因為自己表現失準呢個大錯誤（指走音事件），令自己好唔開心，情緒一度崩潰！經歷過上上落落，嗰刻係覺得好攰、氣餒，覺得點做都好，總有啲負面聲音，但如果我咁容易放棄，會失去好多！咁多年嚟我覺得要喺呢個圈生存，有一樣係好緊要，就係唔可以咁易放棄囉。
感情崎嶇 執筆抒發
事業上一再受挫的Theresa，感情路上同樣崎嶇不平！痛過、愛過，猶如上了寶貴一課，執筆抒發內心情感，治療傷痛，撫平傷口……
每一次戀愛都好似上咗一課，好同唔好都要上呢一課，當係人生一個經驗。其實好多身邊人都經歷過相同嘅事，只不過我係藝人，係要經歷過先會珍惜之後嘅人與事。今次新書都有part係講愛情治療，感情上我係自己嘅治療師，每次出書都係畀機會自己抒發一啲情感。每次我寫完出嚟，就好似放低一啲包袱，起到一個治療作用，個心會好舒服。今次都會同大家分享一下內心世界，其實去到咁上下年紀，人總要經歷一啲事，事業又好、愛情又好，要經歷過先會成長，先會更清楚自己將來個方向。
欣賞偶像 學習榜樣
Theresa是很多人的偶像，在圈中打拚多年，她亦有自己欣賞的偶像及藝人，更視他們為榜樣及目標。
圈裏面有好多藝人我都好欣賞，好似孫燕姿、蔡依林，仲有發哥（周潤發），我欣賞佢哋不同方面嘅嘢。我除咗欣賞孫燕姿歌藝，當睇到佢婚禮時，我覺得好平實，幾鍾意咁，冇理其他人目光，自己做自己事。蔡依林就係魄力好勁嘅女歌手，佢可以練到咁多動作、舞蹈。可能佢又係處女座，我會特別留意佢做嘅事。發哥就係大家一個好好榜樣，以發哥今時今日級數，佢都係好nice，去搭公共交通工具、去街巿買餸，如果有一日可以做到發哥咁，完全casual着短褲、背心、踢拖落街就好！
口述：傅穎
筆錄：薇美
攝影：黎志輝
Hair：Vince!IL COLPO
服裝：MURUA
場地：千鶴日本料理＠都會海逸酒店