(3)許亦妮自誇富貴僅住舊樓
每年香港小姐選舉是非傳個不停，大熱的海外佳麗(3)「D Cup GiGi」許亦妮（Whitney）成為今屆港姐「是非」之冠，除被指男伴多籮籮外，更指她自誇出身富裕，前日她在電視城會見傳媒後，只乘搭港鐵返回觀塘一幢舊式私人屋苑，未顯富貴派頭。
《2011年度香港小姐競選》十五位入圍佳麗已正式公布，眾候選港姐前日進行大翻新及首度見傳媒。每年港姐總會是非不斷，今年亦不例外，被指是今屆大熱，來自英國倫敦的22歲海外佳麗(3)「D Cup GiGi」許亦妮（Whitney），被讀者爆料指她貪慕虛榮，身邊男伴團團轉、更指讀大學時曾去整容，昨日更有報道指她已婚兼生仔等等。
「我都畀人話整容」
前晚會見傳媒後Whitney即換上便服，之前自誇家境富裕的她，與一眾候選佳麗乘專車到將軍澳港鐵站轉乘港鐵前往藍田，之後再打的返回觀塘協和街一幢舊式私人屋苑，未見有名車接送，十分平民化。落車後她見記者拍照即大方笑晒揮手打招呼。
與Whitney14歲已認識的Janice Man（文詠珊），昨日出活動時力撐好友沒有已婚產子兼整容：「冇可能，都唔知邊度傳出嚟！佢入咗圍先同我講，我都好支持佢。（話佢四圍識男仔？）呢樣評論唔到，作為朋友唔會衡量對方係咪識男仔先至交心做朋友。（傳佢整容？）大個咗個樣都會有變化，身材樣貌都會有分別，我都畀人話整容啦。」
生仔假聞不盡不實
而無綫外事部副總監曾醒明則表示已跟Whitney了解過，她指相中抱住的BB是家姐的囡囡，結婚生仔傳聞都是假的。曾生說：「每年港姐都有好多不盡不實嘅讀者爆料，都見怪不怪。」
文、攝：追蹤組