李思欣糕招箍實范振鋒

無綫女藝員李思欣與DJ男友范振鋒（Ricky）拍拖數個月，仍是熱戀階段，適逢Ricky將於本月生日，思欣雖然自認廚藝麻麻，但仍打算為愛郎親手炮製生日蛋糕，增添情趣！

親手整夠滋味

日前思欣到蛋糕店學整美式芝士蛋糕，負責人Angela表示這款蛋糕步驟簡單，最適合初學者，醒目的思欣亦一點即明，將材料用儀器攪勻及打蛋等絕對冇難度，每個Step都處理得妥妥當當，最後她細心地在蛋糕面鋪上士多啤梨，令外觀更好看，思欣望着製成品時一臉滿足，笑言相信Ricky必定滿意，她說：「親手整甜品好好玩，覺得自己整出嚟嘅特別好味，因為充滿心意！」

Step 1 將所有材料放入盤中。	Step 2 然後以打蛋器將材料攪勻。	Step 3 放入焗爐焗30分鐘。
Step 4 在蛋糕面鋪上酸忌廉及士多啤梨。

愛情工作兩忙

思欣表示平日甚少下廚，但願意為男友學廚變身「煮人」，她說：「我覺得男仔識煮嘢食係幾吸引，但間中就夠，反而女仔應該煮多啲，我都幾傳統架！（一齊玩煮飯仔？）仲未試過！相信會幾得意，嘢食入得口就得，主要係享受過程啦！」問到男友生日將如何慶祝？她表示已想好禮物及節目：「禮物係實用嘅，平日我會留意佢有咩需要，有信心佢會鍾意，都唔准話唔鍾意呀！」

雖然有愛情滋潤，但思欣仍不忘為工作打拚，除了接拍飲食廣告外，月中會到湖南出席慈善活動幫助貧童，發揮善心。

材料：芝士（300g）、牛油（80g）、糖（80g）、酸忌廉（30g）、雞蛋（1隻）

採訪：影視組

攝影：沈健程

場地：天使烘焙材料專門店