鄧愛嘉爆父親激瘦50磅
鄧永鏘愛女鄧愛嘉（Victoria）現從事攝影工作，問到會否找爸爸當無上裝模特兒時，她反應很大，坦言感覺很怪，還自嘲未夠班，及後更大爆向來肥胖的爸爸成功減去五十磅肉，搞到要改西裝哩！
意大利品牌MAX&Co.為慶祝中環全新專門店開幕而舉行盛大酒會，一班名人、明星靚女齊到賀，包括有鄧永鏘愛女鄧愛嘉、「扒女」李依琳、「大家樂」太子女陳浩寧、鐘錶美女胡敏珊以及模特兒林莉、莊思敏等。
現職攝影師的鄧愛嘉表示現忙於籌備另一個攝影project，坦言爸爸對她的作品有讚冇彈，記者笑言有否為爸爸拍無上裝那些得意照片？Victoria聽罷即反應很大：「冇着衫唔得！留番畀其他專業人士影啦！」及後，她大爆爸爸減磅成功，成功減去身上五十磅肉：「佢瘦咗好多，日日都跑步，因為Lucy（鄧永鏘現任太太）係跑馬拉松，佢依家所有西裝都要改過。」父親節將至，Victoria坦言爸爸當天不在港，記者笑言豈不是毋須慶祝？她說：「要慶祝，佢會詐型！仲問我父親節送乜呀！」
寧死不屈
李依琳透露被行為怪異的男人跟蹤九年，感覺害怕：「我驚佢傷害我！（屋企人請保鏢？）it's ok。（搵個男友保護你？）maybe！」續說：「佢自稱係做時裝。（有冇示愛？）佢話為我去廟求神。」她表示對方每次來電都沒有顯示，有次更被對方質問為何不聽他電話：「我對佢可以友善，仲同佢講大家可以做朋友，但我唔愛佢，佢反而覺得我係愛佢。（有冇對你講過不文說話？）有，我覺得好惡心，如果世界死剩我兩個，我都唔會接受佢，我寧願死！」
文：名人組