查小欣保護證人唔驚栢芝

身為拉姑好友的查小欣，日前在電台節目內爆霆鋒和栢芝婚變內幕，指栢芝「榨乾丈夫身家」又連霆鋒送給謝賢的千萬豪宅亦不放過，甚至一對兒子的撫養權亦讓給她，更指鋒芝名義上仍是夫妻；查小欣又指有知情人透露霆鋒已將部分物業及基金受益人轉到栢芝名下。言論一出惹起諸多揣測，甚至傳出是拉姑授權她爆料，謝賢（四哥）對此言論有微言，扯火轟查小欣多事！

唔怕四哥兜巴星

昨晚查小欣出席餐廳開幕活動，見慣風浪的她有備而來受訪，問到四哥有否致電給她？她說：「佢冇打畀我，冇我電話。（佢話兜巴星你埋牆？）佢個個都話『星』埋牆嘅啦。（怕得罪四哥？）唔係呢啲嘢，大家都係睇番件事，件事係咁就係咁，講出嚟唔係討好或得罪邊個。」

查小欣（右）與拉姑（右二）私交甚篤，日前爆料指鋒芝離婚，為了「保護證人」堅拒說出爆料者是誰。（資料圖片）

霆鋒、栢芝是否離婚，成為全城熱話。（資料圖片）

「有背後嘅意思」

日前的電台言論，會否加速「鋒芝」離婚？查小欣句句有骨的說：「唔識估。（拉姑授權你咁講？）我唔回應，大家估完一個又一個。（怕唔怕畀人話你搞是非？）我原意唔係咁，都係報道事實，只係報道同分析，既然大家覺得咁唔應該，咁咪唔好睇唔好跟進囉，我都係做番我工作，有背後意思。（之前你講嘅係事實？）如果唔係就已經有人出咗嚟。」問到有否找過栢芝？查小欣說：「冇，要搵我佢自己會嚟搵我。（消息來源係邊個？）我要保護證人。」問到會不會驚激嬲栢芝？查小欣語帶雙關說：「唔係驚唔驚嘅問題，最驚講嘅係事實。」

文：專案組