栢芝停發短訊諗計破冷鋒
謝霆鋒、張栢芝婚變風波愈鬧愈大，連日來認低威的栢芝為求箍煲，向霆鋒喪發過百電話及示愛短訊，但霆鋒企硬不為所動，栢芝前日突然停發一切短訊，採取無聲態度諗計再出招力挽狂瀾，霆鋒就得好友容祖兒親身到吉隆坡開解，有情有義。
自從栢芝被爆瞞住老公在機艙跟床照主角陳冠希自拍留念，令霆鋒怒不可遏，每次激嬲老公栢芝總會主動出擊，軟硬兼施向霆鋒發短訊「耍冧」，眼見今次闖下彌天大禍，本以為重施故技氹得掂老公，連日來喪發「我愛你」、「我好掛住你」等冧到痹的短訊跟老公箍煲，但勢估不到霆鋒不為所動。
為避記者酒店閉關
多年來霆鋒對栢芝縱容呵護，卻換來栢芝重重所傷，最致命一擊是栢芝發難要脅霆鋒喊「離婚」，還要霆鋒搵律師聯絡她的律師，令霆鋒徹底失望，決定對栢芝的來電、短訊不聞不問，霆鋒這招冷待措施相當奏效，令栢芝心生慌亂，據知前日開始栢芝突然停止一切轟炸式短訊，實行轉變策略，由攻變守模仿老公無聲態度，期盼挑起霆鋒好奇注意，才諗計再作部署出招。
身在吉隆坡拍電影《逆戰》的霆鋒，昨日不用開工整日未有現身，一直匿在酒店房內玩自閉，昨晚祖兒剛飛到馬來西亞工作，縱使行程匆忙，也騰出空檔跟霆鋒見面開解，可謂有情有義。
昨晚近10時，祖兒現身吉隆坡的黃亞華小食店，跟霆鋒助手「表哥」、工作人員等食飯，祖兒見到記者出現十分愕然：「我嚟拍廣告，約『表哥』食飯。（點解唔搵霆鋒食飯？）佢唔方便，酒店咁多記者，真係唔方便搵佢，叫『表哥』幫我帶問候畀佢就得。」
問有冇跟霆鋒通電話？她說：「冇，都唔知講乜好，本來想約佢食飯，但佢想留喺酒店。（搵佢？）唔好，咁多人。（同栢芝熟唔熟？）ok，好耐冇見。（傳鋒芝婚變？）由哥哥、姐姐搞啦，我想食飯呀，你哋去食飯啦。」
而栢芝則繼續在深圳為關錦鵬執導的電影《影子愛人》趕埋尾，昨晚在一室內環境開工拍攝，但關錦鵬事前張揚為免傳媒騷擾栢芝會採取嚴陣以待，阻攔傳媒埋身。
傳霆鋒北京有小三
霆鋒經理人霍汶希（Mani）昨日現身鍾舒漫金唱片祝捷會，她坦言前日有跟霆鋒聯絡，但沒有講私人事。雖然霆鋒被家事困擾，但無阻其拚搏態度，日前一場由八樓跳落街的戲竟然瞞住公司，Mani說：「我畀佢激死，我怕佢唔夠集中，近日咁多記者追訪佢，搞到佢唔敢去游水。」
可擔心霆鋒的情緒？Mani說：「我唔覺得佢有咩特別，平時佢都唔係好講嘢，唔係自閉。」有指霆鋒為栢芝暴瘦，Mani澄清說：「佢一直食灼雞胸肉keep fit。」有傳栢芝拍罷《影》片後，即帶兒子飛去吉隆坡探霆鋒，Mani說：「私人事唔講太多，（傳栢芝借財務炒樓？）冇聽過。」《逆戰》後霆鋒將接拍另一部內地電視劇，希望他有時間可以休息。此外，正當霆鋒受家事困擾之時，竟有內地雜誌封面大字標題「爆霆鋒北京包二奶」。
文：音樂組