霆鋒力爭細仔Quintus撫養權

自霆鋒和栢芝驚爆婚變消息後，目前身在吉隆坡的霆鋒，昨日不用開工拍電影《逆戰》宣傳短片，整日在酒店房內玩自閉，惟本報得到一張讀者提供的霆鋒相片，相中的他身在酒店泳池曬太陽，雖然露出燦爛笑容，但卻是對人歡笑背人愁，據知，面臨分居的「鋒芝」為一對兒子Lucas和Quintus的撫養起干戈。

栢芝Lucas形影不離

「鋒芝」育有兩名可愛兒子，大仔Lucas天生一副明星相，繼承了父母的優良傳統，出世後甚得栢芝鍾愛，為了親自照顧Lucas，栢芝不惜暫停如日中天的電影事業，每日湊仔為樂，就算復工和去台灣搵好友大S徐熙媛、范瑋琪相聚，都會帶埋Lucas在身邊，兩母子可說是形影不離。

霆鋒和栢芝婚姻亮起紅燈，一旦離婚，Lucas和Quintus將手足分離。（資料圖片）

放大圖片

相反，細仔Quintus出世後，大部分時間跟嫲嫲生活，霆鋒一直愛錫細仔，霆鋒曾透露覺得胖胖的Quintus樣子似一尊佛，十分祥和，每次霆鋒唔開心，見到Quintus就變得心境平和，所以霆鋒偏愛細仔多些，況且今年一歲的Quintus一直由拉姑照顧，拉姑亦唔捨得放手。

栢芝視Lucas如命根，去到邊都攬到實。	拉姑經常帶Lucas歎茶，感情深厚。	霆鋒暫忘煩惱，在酒店泳池曬太陽。

雖然前日狄波拉好友查小欣在電台節目中爆料，指霆鋒為兩個仔乜都答應，就算撫養權都會讓給栢芝，唔想兩個小朋友的小小心靈受傷害！昨日亦有傳聞指「鋒芝」曾簽署一份婚前協議，其中一條是：「他日無論何種原因分手，張栢芝都可帶走自己所有子女。」然而，據霆鋒身邊好友向本報爆料，霆鋒從沒想過放棄一對兒子的撫養權，他希望跟栢芝一人分一個，霆鋒將極力爭取Quintus的撫養權，Lucas就交給栢芝照顧。

拍跳樓戲拒用替身

備受婚變打擊的霆鋒，目前身在吉隆坡專心為《逆戰》開工，這兩天盡量唔諗家事，日前為一場跳樓戲試戲，由於要從八樓跳下，有一定危險程度，導演曾勸他用替身，但霆鋒卻堅持親身上陣十分搏命，消息指婚變後的霆鋒，返港亦不會回家睡覺，而是在自己的製作公司留宿，至於Quintus目前由拉姑照顧，Lucas則住在陽明山莊。

記者致電霆鋒經理人霍汶希，她指有跟霆鋒通電話，但只談工作不傾家事：「佢心情OK，尋日拍通頂，今日喺酒店休息。」對於「鋒芝」婚前協議，霍汶希謂冇回應，栢芝經理人則斥：「無聊！」

至於在深圳開工的栢芝昨日亦冇露面，有指她是帶着Lucas開工，早前她接受雜誌《ELLE》訪問，直認對Lucas疼愛有加：「即使我見不到老公，我還是會天天『見』到他（Lucas），因為Lucas實在太像謝霆鋒。」