霆鋒為兩子屈服５億任榨乾

鋒芝結婚五年雖然度過一段甜蜜歲月，還育有兩名可愛兒子Lucas和Quintus，惟兩人性格一個反叛一個倔強，可說火星撞地球，前日本報率先披露栢芝已搬離舂坎角愛巢，昨日本報更收到可靠消息，「鋒芝戀」可能壽終正寢！

撩交嗌用仔作籌碼

據知，鋒芝早於兩年前感情已出現問題，栢芝常為小事撩交嗌，還用兒子作籌碼，霆鋒為了愛兒一直啞忍及作出讓步，當知道栢芝想要物業揸手，他就將名下物業轉名給她，藉此拖住關係，但每次嘈交都要以錢平息，長年累月下，擁有五億身家的霆鋒慘被「陰乾」。

母親節當日栢芝自台北返港於機艙巧遇慾照男主角舊愛陳冠希（Edison），她竟忘記曾喪鬧Edison「貓哭老鼠假慈悲」，主動調位兼合照，結果終於觸動霆鋒神經，即時叫律師暫停搞轉名文件，未至於所有物業被栢芝清袋。據知，連日來栢芝狂發短訊和致電給霆鋒，但他都不聞不答，離婚之意十分決絕。

查小欣爆婚變內幕

昨日有報道霆鋒發律師信逼栢芝分居，狄波拉好友查小欣在電台節目《巴巴閉邊個夠我查篤撐》中踢爆鋒芝婚變內幕，她說：「據知霆鋒冇單方面發律師信，賣舂坎角係套現，栢芝帶兩個仔搬咗去陽明山莊，霆鋒畀咗百幾萬租一年。」

查小欣爆料指知情人士透露鋒芝早有問題：「出席金像獎時表現得非常恩愛，都係想顧全大局，但栢芝成日為小事家嘈屋閉，霆鋒每次想息事寧人，就將佢手頭物業轉畀栢芝，亦成立咗基金，將所有錢轉畀基金，而基金唯一受益人係栢芝，但栢芝都係一次又一次同霆鋒大吵大鬧，不過霆鋒唔會還擊，連佢買畀四哥嘅千幾萬豪宅都畀埋栢芝。」

栢芝宣布復出後接了六部戲，部部過千萬片酬，拍戲後夫婦倆聚少離多，嗌交愈嚟愈多，查小欣說：「後來見物業轉得咁上下，栢芝就要求賺大錢嘅製作公司股份都轉為佢名下，栢芝好似想一鋪清霆鋒袋，但我當時聽到唔相信，因為佢哋復合當初，栢芝打畀我傾，話佢好愛霆鋒，如果霆鋒唔要佢，唔知點算。估唔到事隔五年，今日栢芝對我嚟講好陌生。」

若離婚霆鋒變三失

雖然身邊朋友替霆鋒唔抵，霆鋒為了兩個兒子乜都答應，查小欣說：「就算撫養權都會畀栢芝，唔想兩個小朋友小小心靈受傷。依家身邊人最驚栢芝帶兩個仔去馬來西亞搵霆鋒當眾跪地認錯，因為呢樣栢芝以前都試過，所以劇組好緊張；另一估計，栢芝好可能宣布有第三胎，如果霆鋒到時同佢講離婚，霆鋒變三失：失財、失家、失形象，好彩霆鋒福星高照，發生咗『機艙事件』令律師準備好嘅文件都hold住，依家佢哋名義上仲係夫妻。」

目前霆鋒在吉隆坡拍電影《逆戰》宣傳短片，栢芝則在深圳拍《影子愛人》，昨日本報記者走訪深圳華僑城，惟遍尋不獲栢芝蹤影，記者問及栢芝經理人Emily，她表示家事不作回應。另方面，記者致電英皇唱片及藝人管理部總監霍汶希，問鋒芝是否辦分居？她說：「唔回應亦唔評論，霆鋒亦冇回應。（工作有冇影響？）佢昨晚拍通頂冇瞓。（心情？）全神貫注拍戲，要應付好多危險場面。」

文：音樂組