陳嘉桓慳啲使搭隧巴捱快餐
最近密密接job搵銀的陳嘉桓（Rose），為儲錢買樓即「慳妹」上身，日前在銅鑼灣出席活動後，棄坐保母車，寧願搭巴士過海返回美孚寓所，更速食30元加大快餐填肚。
年僅18歲的Rose，早前擔任林峯MV女主角傳緋聞而火速上位，加上其樣子甜美，很快便成為廣告及商戶的搶手貨，除四出洽談電影工作外，更密密接job搵銀，雖然已賺了不少，但她原來是慳妹一名。
日前晚上8時許，Rose在銅鑼灣出席完活動，因沒有保母車接送，與助手步行到附近巴士站等車，雖被途人認出，她卻未有理會，繼續煲電話粥。直至往美孚的巴士駛至，Rose單拖搭巴士過海返家，埋單10蚊有找。
搵朋友接送
上車後，她拿出耳筒聽歌兼玩電話打發時間，足足坐了45分鐘車程才抵達美孚。仍未吃晚飯的她，落車後即進入附近一間快餐店，購買了一個約30元的加大碼餐坐低填肚，之後獨自步行返回附近寓所。
翌日，Rose在中環出席活動後，與助手走到有贊助的名錶店揀選靚錶，不用花錢又有靚錶戴，完全符合其慳錢原則。揀完手錶後，Rose竟連車錢都慳番，轉乘友人的保時捷四驅車走人。
文、攝：追蹤組