周秀娜欲胸降籠屋做紫荊俠Ⅱ
本港近日突然出現一位派錢濟貧的「紫荊俠」惹起全城關注，更因她身穿緊身低胸夜行衣及刻意蒙面，故大家只能憑胸認人，由於女俠自稱經常出入Ball場，雖然她昨晚發聲明表示並非盛傳的名媛萬寶寶，但仍引發社交圈的競猜遊戲，向來有俠女精神的周秀娜和莊思敏，更齊聲表示想跟女俠「交叉合作」，共襄盛舉！
紫荊俠早在今年三月廿九日在facebook登場，揶揄政府亂派錢，故率先行動，自掏腰包向窮人派發六千元，上月便到佐敦一籠屋給失業人士每人派發一百元現金及糧食。由於紫荊俠裝束出位、刻意蒙面，加添不少神秘色彩，在社交界引起很大回響。
研究冬裝方便出動
一向樂於行善的周秀娜，前日才現身北京參與一個兒童公益活動，給一班流浪兒童及殘疾兒童送上親手製造的朱古力泡芙，還與他們載歌載舞玩遊戲。對於紫荊俠的善舉，周秀娜亦有留意，表示要為對方鼓掌：「香港呢個城市太多烏煙瘴氣事情，喺亂世時有咁正義嘅人出嚟，值得表揚，有機會嘅話，都想同佢Jam下，佢係一個慈善英雌，行為會牽動社會上需要關心的基層市民。」但問到會否倣效女俠行善，她表示需要認真考慮一下，但笑言：「他日如果係我，有人認出我嘅話，都唔好篤爆我，我打扮成咁都係唔想人認出啫！」還稱將來定會跟設計師研究女俠裝束，因紫荊俠的裝束不太適合冬天。
陳細潔自嘲身材不及
紫荊俠身份尚未揭盅，社交圈中又傳出身兼保良局總理的鯊魚女陳細潔才是紫荊俠，不過昨日她矢口否認說：「我無咁好身材，要戴個超級push up Bra先得，同埋我一定唔會着到咁性感做慈善，（知唔知係邊個？）覺得未必識得嘅人，我識萬寶寶，但覺得應該唔係佢，不過我都唔清楚，如果做慈善唔使着得咁美麗，亦唔使畀人知。」
徐美琪大讚夠正面
同樣是富家女出身兼擁有驕人身材的莊思敏亦否認自己是紫荊俠，但就大讚對方行為英勇正義：「我都有留意紫荊俠嘅報道，見佢咁英勇正義當然力撐支持啦，我覺得佢係邊個都好都無所謂，佢係做緊好事，如果大家要尋根究柢可能會對佢造成壓力，令佢停止呢個行為。呢啲咁有意義嘅事如果佢搵我，我會拍心口上，平時我唔會隨便賣肉，但如果要我同佢一齊性感上陣幫助窮人實無所謂。」
不時公開跳舞籌款的徐美琪亦被疑是「紫荊俠」，她昨日否認，雖讚「紫荊俠」的做法帶來正面意義，但自己會選擇低調，以免惹來負面新聞：「好似我每日捐1000蚊畀機構，亦唔需要張揚。其實我有能力就去捐，唔係你所講嘅天文數字！」
文：名人組