克勤欲買廣告亮相無綫破冰
被喻為無綫契仔的李克勤，因版稅問題，令四大唱片跟無綫至今仍未破冰，恨在無綫亮相的克勤，揚言要向無綫買下廣告時段，又戲言要用「小喇叭」為《勁歌金曲》冠名贊助，幽無綫一默。
《李克勤‧香港小交響樂團演奏廳2011》昨日舉行記招，相隔10年再與好友音樂指揮家葉詠詩合作，並在活動上獲葉詠詩送上大號及小號予克勤兩名囝囝Ryan及Rex，克勤發揮風趣一面笑說：「咁即係大喇叭同小喇叭？」問到囝囝可有遺傳其音樂天分？克勤說：「唔知，Ryan鍾意唱歌，識唱我啲歌，但《罪人》就淨係識副歌，三歲已經『為非作歹』（歌詞）。」
放棄搞棟篤唱
克勤透露原本此檔期是在伊館搞棟篤唱，但經理人表示難賺錢，加上紅館亦不適合搞棟篤唱而作罷。克勤表示經歷95年個唱門票滯銷後，每次亦相當緊張銷情。問他會否因欠缺無綫宣傳而令銷情有所影響？他說：「未知，睇下賣唔賣得晒。（賣晒唔使簽無綫？）唔係，或者喺《東張西望》賣廣告，（考慮贊助節目？）『小喇叭勁歌金曲』？」
提到克勤所屬的唱片公司環球被指撇甩四大，搶先與無綫破冰，克勤將成為首位自版稅風波後再簽無綫的歌手，環球唱片高級副總裁黃劍濤（Duncan）拒絕回應報道，克勤則淡定表示：「簽咩呀？（無綫呀？）話同環球開間公司？嚇鬼到我呀，『環綫』唱片公司呀？我冇收到風，係就『柳暗花明又一村』，不過咁秘密嘅決定都唔會話我知！我就唔信，係大家諗多咗啫！」
邀陳志雲睇騷
克勤坦言閒時有低調與各台的高層朋友聯絡，但與合約無關，並打算邀請陳志雲及各台好友欣賞個唱。被問是否最佳破冰人選時，克勤笑說：「最好搵我啦，邊度跌低邊度起身，相信終有一日會解決！所以要練定氣功，長命啲，個仔讀到中學應該搞掂（四大糾紛）。」
採訪：音樂組