林子祥瞞住沙麗上床
林子祥（阿Lam）與黃真真，一位是樂壇巨星，一位是名女導演，兩個風馬牛不相及的人該扯不上甚麼關係，原來他倆早已相識，阿Lam更是「由細睇到真真大」。拍過不少電影的阿Lam，還以為畏高的他最大挑戰是拍「跳樓戲」，卻原來「床上戲」才考起他！
畏高的阿Lam在48樓拍戲要頂硬上，老婆葉蒨文只能在屋內乾着急，化擔心為食量……
危坐48樓 條褲濕晒
黃：黃真真 林：林子祥
黃：你記唔記得我哋係點識架？
林：嗰時詩詩幫我錄《三人行》首歌，我又識你媽咪，之後詩詩同我講家姐喺紐約返嚟，佢拍過戲做導演，依家返嚟發展，成家人咁樣識，不過我哋隔咗好多年先合作，第一套係《六壯士》，你做咩咁耐先搵我？
黃：係呀，都隔咗幾年，嗰時我係小導演，啲戲budget（資金）細，咁之後budget大啲，所以先搵到你拍。你仲記唔記得我哋拍坐喺48樓嗰場戲？
林：記得！我畏高架嘛。
黃（笑）：我記得嗰陣時我個副導演走出去騎樓度，之後同我講「阿Lam會唔會好驚？使唔使同佢吊威吔？」咁我就叫佢自己問你，佢問完你同我講「阿Lam話好喎！」咁。
林：點解你唔自己出嚟問我呢？
黃：咁我問你可能你會諗冇得推，我咪叫副導問囉，不過我哋都感受到你坐喺48樓真係好高，聽到你講OK都好愕然。
林：因為你個副導同我講：「導演話你一定要出去做嗰場戲。」咁我就話：「吓？係呀？咁好啦！」同埋嗰場戲唔止我，仲有李克勤、鄭伊健佢哋個個都要企上去天台。
沙麗兩頭騰
黃：但最好笑係拍緊嗰時，拉咗威吔，都拍咗兩個幾鐘，我哋耐唔耐就問你使唔使去洗手間，你都話唔使喇，我坐喺度唔郁架喇！哈…哈…
林：因為嗰時條褲都濕晒喇，就咁坐喺側邊，下面咩都冇，我直情唔想望落去，淨係望前面！
黃：嗰場戲係講你自殺，又要做戲又要記對白，你真係好專業！但喺屋企裏面我記得葉蒨文（沙麗）嚟探班support你，佢緊張到喺你拍戲嗰陣食咗唔知幾多包大薯片同朱古力，戥你緊張，驚到係咁食，又唔敢行出去影響你，佢仲驚過你咁。
林：係呀，因為嗰年係啱啱有意外之後（2003年在演唱會不慎失足墮窿受傷），所以佢好緊張，又驚我緊張！
拍跳樓戲難，但床上戲更難，唔可以太假，又唔可以狼得滯……
攬女床戲 辛苦過打
林：嗰刻我都係盡量做好嗰場戲，不過做呢場戲都冇做床上戲咁緊張，咁啱又係你呢個導演要求！
黃：你咁緊張係因為同梁詠琪（GiGi）第一日拍《女人本色》嘅第一場戲就要上床。嗰時因為個景係租番嚟，我哋唔拍唔知會唔會冇得拍，所以先要你哋拍咗先。
會先斬後奏
林：嗰次拍咗成晚，你知嘛，拍呢啲戲仲攰過拍打戲，唔可以拍得肉酸，又唔可以太假，又唔可以狼得滯，所以都好難架！
黃：話時話，其實沙麗知唔知有呢場戲？
林：唔知架！呢啲梗係唔講啦！拍完先算，哈哈哈！
黃：我覺得你同其他演員好唔同，就算啲對白唔係好真，你都有自己style，好似唱歌咁，冇人唱到。我寫劇本嗰陣都會諗有咩角色啱你拍。
樂壇巨星拍戲的最大要求是甚麼？最怕捱夜……
瞓覺要緊 咁至啱plan
林：最緊要係日頭戲，唔可以夜晚戲，因為我要瞓覺！其實好多角色我都做過，淨係冇做過古裝，陸小鳳係唯一一個我啱做嘅角色，因為有鬍鬚。
黃：我知！嗰時我搵你拍兩套戲都就晒你，你最關心就係「多唔多夜戲拍架？」
老婆啱復出
林：最緊要有覺瞓呀！其實我覺得沙麗先要出番嚟拍戲，我睇番佢以前啲戲，佢真係一個好好嘅喜劇演員，佢做喜劇又係另一套，好好笑。
黃：係呀，同埋沙麗個人好真，你會覺得佢唔係夾硬嚟！不過你個人都好特別，不論衫定係鬚，同你拍戲就知喇，連拍戲啲衫都自己帶嚟，出私伙。
林：我個人好有計劃，咩都要一早plan好晒，我覺得應該咩都要諗定，唔好到時先，一定要諗好自己要點做！
後記：愛拍戲多過拍拖
阿Lam雖然是真真的長輩，但當日看他們的對答覺得他們的關係較像朋友，嘻嘻哈哈，無所不談，不過真真卻從未帶過男朋友給阿Lam過目。阿Lam說：「佢勤力得滯，都冇時間諗第二啲嘢，好投入，咩都揼晒落去。」真真就解釋道：「我鍾意拍戲多過拍拖，係真嘅！我enjoy拍戲寫劇本，而且都已經冇咩時間拍拖，仲點帶男朋友畀佢睇呢？」
文：林詠
攝影：黃叔榮
場地：The Harbourside @ The InterContinental Hong Kong