薛凱琪「單次」解封受訪得戚
四大唱片歌手之一的薛凱琪（Fiona）昨日出席完手機活動，竟接受無綫訪問，一度惹來「版稅風波」已解決，原來遭無綫封殺約兩年的Fiona能夠「單次」解封，全因手機品牌買了無綫廣告，難怪Fiona受訪時表現得戚，全程四萬咁口。
無綫與HKRIA的「版稅風波」糾纏約兩年，雖然有傳無綫近日有新股東加入會盡快解決事件，但只聞樓梯響。繼早前屬「四大」歌手的陳慧琳接受無綫訪問後，昨日Fiona出席手機活動亦獲無綫派員採訪兼受訪，經查證原來大會在無綫購買了廣告，Fiona才得到一次解封，難怪她受訪時四萬咁口，表現得戚。
而無綫外事部副總監曾醒明接受電話訪問時解釋：「因為廣告商買咗廣告時段，薛凱琪係以嘉賓身份出席宣傳產品，唔涉及唱片公司，亦都唔係表演，所以冇牴觸。」
否認患抑鬱病
有傳Fiona因與房祖名分手而患抑鬱病，有備而來的她直斥報道失實，並否認患抑鬱說：「係因為太投入角色搞到精神緊張，導致器官出現問題。（婦科病？）想留番少少私隱。」Fiona表示已食中藥調理身體，問到是否「調經」？她尷尬說：「其實呢……畀番少少私隱我。（依家每月都好舒服？）我日日都好開心。（有傳你同祖名分手搞到咁？）我哋冇分過手，因為從來冇開始過。」
「好嘢要等待」
Fiona與祖名的緋聞傳足七年，問到有否擔心嚇怕追求者？她說：「以前我會驚影響我搵真命天子，自從信咗主，我覺得主會畀最好嘅嘢我，好嘢就要等待。（祖名唔係好嘢？）佢好好，只係我哋冇拍拖。」她又大方透露與祖名閒時會傾電話「吹水」，但不會提及有關緋聞報道。
文：音樂組