蔡加讚汪圓圓巴黎浪漫

蔡加讚自宣布拍拖後，城中鑽石王老五更是買少見少，而工作繁忙的加讚平日難得與女友見面，故正好趁復活節假期，與圓圓到法國旅行享二人世界。此行他們的主要節目是行博物館，昨日見他們的旅行照，大部分是頭貼頭的自拍照，背景都是各大博物館。

感情大增

蔡加讚說：「我哋兩個都鍾意藝術，去博物館可以由朝行到晚；又鍾意去一啲靚餐廳試法國菜，喺當地好出名嘅Alaine Ducasse食咗一餐好好味嘅乳鴿；又有次行街經過一間好普通嘅cafe，但估唔到佢哋嘅法國蝸牛咁好味；不過一日三餐都食法國菜，返嚟香港之後見到法國菜都怕怕。（同女友感情大增？）幾好，幾開心！」他說由於臨時決定出發，故很多餐廳都難於訂位，需要朋友代勞；而此行沒有買太多手信，但一向孝順的他，亦挑選了禮物送給媽咪。

蔡加讚同圓圓到巴黎度浪漫復活節。

蔡加讚同圓圓於博物館前頭貼頭拍照，甜蜜到漏。

翹實謙仔

而汪圓圓與羅仲謙昨日為手袋品牌COACH擔任模特兒，二人壓軸出場時手翹手示範手袋，儼如情侶。問圓圓可擔心加讚呷醋？她說：「唔知，我好大方，佢都應該係同我一樣！其實如果佢呷醋先至正常。」她表示工作上與男友互相尊重，若有性感演出需要亦會問對方意見。

圓圓又謂即將拍一部愛情電影，不知道是否有接吻或性感場面，但都會與男友討論商量：「男朋友當然重要，工作亦好重要，睇劇本需要！我係新人，好多嘢都想試。（有否性感底線？）查實我好保守！」

羅仲謙透露即將與佘詩曼拍新片並有對手戲，他稱不擔心二人傳緋聞，因之前已合作過，提到他與傅穎的緋聞時，他即說：「唔好講啦！」對阿佘與一商人的緋聞，他表示自己係外人，不會問人哋私事。

文：名人組