李亞男豁出去當騷藝術品
模特兒身材邊個唔想要？長腳蟹呂慧儀（Konnie）和今次茶敍的李亞男都得天獨厚，同樣擁有九頭身完美比例，難怪每次拍劇都獲監製垂青，例必以三點式泳裝示人。不過，身為基督徒的亞男直言行性感要過心理關口，反而Konnie認為天賦本錢唔怕騷，只愁生得太高嚇怕追求者！
娛圈長跑定必達標 有身材 = 有事業
呂：呂慧儀 李：李亞男
呂：我同你都係選美出身，唔知點解每次拍劇都被揀中要着泳衣出鏡？
李：其實當初好抗拒，屋企人根本唔贊成我入娛樂圈，加上我信主耶穌，有諗過喺台上着泳衣同宗教教旨係咪有衝突？經過一輪掙扎後，同家人、教會朋友商量過，發現原來都OK架，只在乎你用咩心態去表達呢件事，神創造我哋人體咁美麗，可以用藝術品角度展示畀大家睇。如果劇情需要，我都唔會拒絕。
呂：我覺得唔同地方有唔同文化，好似伊斯蘭教咁，女人一定要包頭；但我哋生活喺香港呢個文明、自由嘅地方，只要唔係敗壞風氣，我覺得性感冇問題，反而好欣賞一班o靚模嘅勇氣，咁細個都夠膽着三點式示人，如果喺佢哋嘅年紀我未必做得到。
李：我比較中立，但如果係我阿妹一定唔畀，希望佢可以先讀好書，太年輕會唔捨得，寧願我做嘞。
呂：我比較幸運，第一部劇遇到「長腳蟹」呢個角色，出嚟就已經好有noise，我接受能力比較高，又唔係叫我剝晒，大把人着過比堅尼，我又唔係第一個。
李：性感可能只係一個開始，娛樂圈對我嚟講係一場長跑賽，自己好似一隻烏龜，因為加拿大長大嘅人無論講嘢同做嘢都比香港人慢五倍，所以初初嚟香港好難適應，其他人好似白兔一樣，但我相信只要唔偷懶，一定可以達到目標。
有愛滋潤公主變浮誇 文靜 VS 熱情
呂：果然目標明確！同三年前初認識你時唔同晒，當時你超級怕醜同斯文，直情好似一隻鵪鶉咁。而我就剛相反，係最嘈嗰個，天生就多嘢講，喺阿媽肚裏面已經吱吱喳喳。
李：有時性格相反嘅人，可能會互相吸引，所以我大部分朋友都比較多嘢講，我都要向Konnie姐好好學習，做個健談嘅人。
呂：嘩！玩到咁大呀！我覺得自己不知幾斯文，你以前成日唔出聲，有時唔知你諗乜，擔心你係咪心情唔好，寧願行開畀你休息吓。但自從你同「慳啲啦Baby」（王祖藍）拍拖後，個人變晒，成日笑咪咪。
李：其實我份人係90%開心，唔開心寧願匿埋一邊，自己處理咗先，我覺得娛樂圈應該係帶歡樂畀大家。如果平時嘅你好sad（傷感），點會影響到身邊人，除非你好入戲啦，連自己都呃埋。
呂：我就係100%開心嘅人，天生樂觀，無乜嘢能夠影響到我心情，連是非、緋聞亦只會選擇性地聽。除非係我最在意嘅爸爸媽媽，但佢哋唔會令我擔心。
李：提起父母，媽咪之前話我粗（粗魯）咗，由於自小媽咪當我係公主，好似你咁斯文，講嘢有禮貌，笑又唔可以大聲。但唔知係咪跟得祖藍多個人變得浮誇，係時候調節吓。
呂：豈有此理！笑我呀？搞到我忍唔住笑到個口咁大，擺得入兩隻生蠔囉，我真係要矜持少少、女仔番啲，如果唔係好難吸引到異性。
讚祖藍可愛樣樣好 由地下情到公開
李：你好似冇乜是非，連緋聞男友都冇，全部都好正面。
呂：你真係唔留意娛樂圈，之前我咪傳過同志偉哥囉，仲有記者問我，你會唔會好似李亞男咁呀，揀個……
李（搶答）：揀個好得意、好可愛嘅男朋友。
呂：哈哈，其實我都唔記得自己點答，應該話唔敢揀前輩啩，因為好大壓力。咁你覺得祖藍仲有咩其他優點呢？
李：條腿幼啦、條腰幼啦、kawaii呢……其實佢外表已經贏晒，我好自卑呀，哈哈。我仲好欣賞佢有內涵，愛主、忠心、工作時認真、拍拖亦好認真。
呂：真係好羨慕，兩個都係公司力捧嘅藝人，工作上可以互相扶持，無論幾時都咁甜蜜。
李：我哋都會鬧交，有時工作上各持不同意見，佢要求好高，成日彈我呢樣唔好、嗰樣唔啱，連我着衫都有意見，有時會諗，我係女仔，點解要由一個男仔教番我着衫，真係好鬼激氣。
呂：當初唔公開係咪好大壓力？
李：要守住一個秘密其實好辛苦，谷住谷住，但大家有共識，希望能夠開花結果先至講，後來被人發現咗，唔想再呃住大家。依家公開咗成個人鬆晒，估唔到大家咁包容。
介紹親戚畀長腳蟹
呂：如果我真係拍拖，我諗我唔會認，你哋同公司就話好，如果同圈外人拍拖，大家嘅接受程度可能冇咁高。可惜我喺公司揀唔啱，太多靚仔嘞（偷笑），競爭好大。
李：你都揀個「可愛」架啦，我介紹祖藍啲親戚畀你，同佢一樣咁kawaii呢。
呂（高八度）：祖藍啲親戚？雖然我唔介意高矮肥瘦，但我嘅過去式（男友）都偏向高大型，我揀男友亦唔介意樣貌，因為靚仔好主觀，到七老八十一樣會皺皮。但我會考慮降低少少條件，否則擔心嫁唔出做剩女。
後記：唔着高踭鞋唔自在
訪問當日，亞男因為忘記帶高踭鞋，搞到周身唔自在，幸有Konnie出手相助，將自己對三吋Ankle Boots相讓，寧願自己着平底波鞋。亞男解釋：「祖藍成日教我影相、出席活動時要着高啲，靚吖嘛，只要平時出街就番佢着平底鞋咁就得啦。」
文：林海
攝：黃叔榮
場地：H One@ifc
服裝：Juicy Couture