呂晶晶劈腿 高層興叫停Job
本報踢爆呂晶晶與唐詩詠近日不約而同搭上無綫奀星黃嘉樂，而最近傳與亞視高層盛品儒拍拖被捧為亞視一姐的呂晶晶，消息傳出後，由於感情生活太多姿多采，辣興亞視，原定主持的旅遊節目昨日突然臨時被飛起，連帶斟洽經理人合約做亞視「親生女」亦Hold住。
承認韓國之旅被飛
對於被飛出主持節目，晶晶昨日接受電話訪問時亦承認，她說：「突然間話唔使去，因為我係內地護照，韓國簽證做唔切，（緋聞影響令公司叮走你？）唔會啩，公事還公事，感情還感情，（可惜？）冇辦法，咪留喺香港拍劇囉！」亞視高層葉家寶亦承認晶晶的主持節目換人，以及斟洽的經理人合約亦暫時叫停，不諱言公司欲盡量栽培自己人。
梁靖琪為詩詠做媒
不過身為好姊妹梁靖琪（Toby）昨日於奧海城出席新劇《花花世界花家姐》宣傳時，力撐詩詠未有與黃嘉樂愛火重燃，她謂：「肯定冇，一定唔係，佢哋冇可能發展，因為嘉樂係詩詠阿哥，希望喺我嘅婚禮上有好男仔介紹畀佢啦！」明年結婚的Toby更稱婚後生B會餵人奶以保身材。
另有關近日無綫臨記罷工一事，不少導演、監製都叫入組幫手，父親是無綫高層的Toby笑說：「叫我阿爸做都幾好笑！但阿媽（前無綫經理人）唔會！」
文：影視組