祖兒賀壽狂歡氹谷氣詩
容祖兒和胡杏兒出席義賣活動，齊被問及「密友」時，前者坦認將和何韻詩慶祝生日；反觀杏兒卻避談和黃宗澤的關係，可見祖兒在感情上，遠比杏兒愛得坦白、勇敢。
昨日祖兒、杏兒以「樂施大使」身份出席慈賣活動，兩人更身體力行向現場fans賣米募捐。今日是母親節，孝順祖兒表示會連續兩晚和媽咪食飯慶祝，還會送花及禮物，早幾年媽咪曾向她催婚，但自感無能為力，故一口將重任「卸」給已有穩定女友的胞弟。
勸好友慳番啖氣
談及其「密友」何韻詩將於後天（10日）生日，問祖兒可會約阿詩食飯慶祝？她坦言：「都會，梗係佢約我啦，會成班朋友一齊食，因為佢鍾意熱鬧。」她自認是「悶人」，不識炮製驚喜，如她心情好，也會「賣口乖」不再「窒」阿詩。
問她可曾試過激嬲阿詩？祖兒就話未試過，因阿詩屬「玩」得之人，至於阿詩為新歌遭網民上載而動氣，祖兒勸阿詩慳番啖氣：「呢啲都搵唔到源頭，唔好傷自己條氣，下次小心啲，佢好執着呢啲嘢，（網民）都係早佢半日（上載）啫。」不過祖兒補充說會支持她。
杏兒講男友扮傻
杏兒被問到緋聞男友黃宗澤以「睬」否認兩人分手，似認拍拖？她扮傻說：「係咩？（拍拖）冇呢件事，（唔係拍拖？）哈哈，唔回應，費事講錯嘢。」再問她是否不承認對方？杏兒頻說：「冇咁嘅事，唔好逼我啦。」再問她可會叫對方低調感情時，她「鞋鞋」聲，但揚言不抗拒和黃宗澤齊工作。
採訪：音樂組