梁嘉琪得前輩開竅跨出逆境

梁嘉琪剛剛與無綫簽了包薪經理人合約，正式成為無綫「親生女」，她坦言最渴望多些拍劇機會。

讀演藝學院出身的她，多年前加入有線擔任娛樂台主播，更參與過《怪談》及不少旅遊節目演出，四年前轉投無綫，亦由主持收費電視台節目開始。

問嘉琪喜歡當主持還是拍劇？她說：「要我揀兩樣都鍾意，我好貪心，不過拍劇遇到好角色、對手，出來嘅滿足感的確好大。」

嘉琪於無綫的處女作是《學警狙擊》，那時雖然監製給她不少信心，但嘉琪卻鑽入牛角尖，陰影一度驅之不散，她說：「嗰陣好嬲自己，冇把握好機會，高估咗自己對逆境時嘅應對能力，出嚟嘅效果令到我好難接受。嗰陣我都同過不少前輩傾偈，佢哋都同我講要跨出自己，作出改變。」

問她拍《學警》時是否聽到不少打擊說話？她不諱言：「少少啦！都有啲唔開心，自己性格慢熱，嗰陣朋友唔多，冇人同我傾偈，都有啲陰影。」

喜獲馬國明提點

多年下來，嘉琪有不少演出機會，在《洪武三十二》、《女拳》的演出均令人留下深下印象，現正拍攝《回到三國》，飾演林峯的妻子。提到《女拳》中層面甚多的一角，嘉琪坦言慶幸得到監製羅永賢及前輩岳華、馬國明等的提點，她說：「雖然個角色戲份唔多，但每次出場都有佢嘅功能，以前接到劇本會擔心，依家自己豁出去，而且好多情緒戲嘅處理，馬國明幫咗我好多，自己遇到咁好嘅對手，都覺得好好彩。」

文：影視組 攝：李廣成

髮型‧化妝：Shirley Choi