傅珮嘉幸福人母不言休
曾經將《絕》一曲唱到街知巷聞的女歌手傅珮嘉（Maggie），經已嫁為人妻，兼誕下囝囝Jasper。不過，這位幸福少奶奶仍未言休，從未放棄音樂的她更準備努力創作，繼續音樂理想。
久未露面的Maggie近年在台灣定居，去年7月下嫁台灣商人，二人誕下肥肥白白的囝囝Jasper，幾乎每日在微博都會見到她發Jasper的相片，非常可愛，Maggie坦言丈夫令她改變很多，她說：「我諗我人生中最開心嘅兩件事，就係識咗呢個老公，同埋生咗BB，佢性格好樂觀，影響埋我，睇好多事都會正面啲，所以依家生活得好開心！」
為愛甘願走樣
老公的家族經營飲食業，自行研製台灣牛肉麵獨門湯底來港開舖，吸引不少藝人慕名而來，Maggie笑言為支持對方曾經食過無數碗牛肉麵：「有一年我生日都係食牛肉麵，佢對食物好用心，呢個都係我欣賞佢嘅地方！」Maggie算是麵店的兼職公關，不時招呼香港朋友，她說：「我當同班朋友見面之嘛，其他日子我唔會落舖，事業上都係大家分番開好啲！（佢為你喺香港發展大犧牲？）我大犧牲啲，生完小朋友，之後身形都變晒，真係好慘！」
Maggie坦言沒有離開樂壇，亦沒有放棄音樂，她說：「結婚前其實一直都有玩band，我諗今年會有創作出嚟，我未諗係出碟、出歌定係點，唔好限死自己，以前太在乎個市場點諗，依家做嘢個心態係為興趣。」她笑言老公曾經上youtube聽過她的《絕》，其他作品卻不感興趣，但無論如何都大力支持她，Maggie希望藉住音樂令香港的樂迷能夠重遇昔日的「傅珮嘉」。
文：音樂組
髮型：Ason@Hair
場地：三星牛肉麵