陳豪自比發哥捱得冧

情變期間陳豪依然全情投入新劇的拍攝，雖被指殘爆，但未有影響工作態度，不過同期則有馬德鐘的太太投訴老公拍劇辛苦似收買人命，陳豪則不太認同：「以前梁朝偉、周潤發年代拍劇有邊個唔辛苦，一樣拍到好質素嘅劇集，我覺得辛苦都係兩、三個月嘅事啫，亦唔諗自己，只諗觀眾鍾唔鍾意，食得鹹魚抵得渴，不過各有意見，啲人會話我攞咗獎至咁講，其實贏唔贏我都係咁講，入得嚟就預咗捱，公司係畀機會我練演技，熟能生巧至有進步。」

拍鍾嘉欣變年輕

同期的佘詩曼早前公開將向外闖，又會否令陳豪動心？他笑言：「真係唔知將來會點，暫時仲有合約且合作得開心，我同意唔能夠停留喺一個階段，但有啲同事出咗去返嚟一樣有火花，好似秋官（鄭少秋）咁！」

談到新劇《點解阿Sir係阿Sir》出街後收視不俗，陳豪即喜上眉梢，又言愛搞笑，跟吳卓羲、鍾嘉欣等合作，令他年輕了十多年，而他亦很欣賞另一笑匠歐陽震華，記者笑他搞笑得來比歐陽震華靚仔，他笑言：「唔關事，波比好得人鍾意，係無綫福星。」

表情多多的陳豪直言愛拍喜劇。

跟鍾嘉欣合作，陳豪笑言令自己年輕不少。（資料圖片）

攝影：李廣成

髮型：Ivan Lee@Headquarters

文：影視組