林欣彤寧瞓覺唔恨拍拖

林欣彤（Mag）前晚為《勁歌金曲》錄影，而兩位緋聞男友、同是「巨聲二幫」的羅孝勇、胡鴻鈞都有出席，三人更大方影合照，不過三人卻沒有合唱機會，問到Mag哪一位才是她的真命天子？她笑謂︰「我冇時間理呢啲嘢，依家只想專注讀書同做嘢。（兩個都唔啱你咩？）佢兩個都幾好呀！（一齊追你?）冇，通常我哋都係一齊去玩，呢排都好少見到佢哋。」

擇偶條件簡單

問到是否公司叫不要拍拖？Mag謂︰「冇，不過依家我都唔係一定要有呢啲嘢！」至於擇偶條件，她指心地好、喜歡音樂、五官端正便可，又謂暫時唔恨拍拖，只恨瞓覺。而有指她帶挈胡鴻鈞出席不少活動搵真銀，她謙稱︰「我冇咁大能力，都係公司安排。」

此外，Mag前晚演繹王菲的《約定》，問她何時有自己的歌？她說︰「未面世，未知幾時可以攞出嚟，暑假應該會推出唱片，希望效果有咁好得咁好。」

文︰影視組