林子祥紅館開騷窿照裝

阿Lam將於6月18、19日假紅館舉行《VINTAGE LAMUSIC CONCERT》演唱會，剛剛踏入入行第35個年頭，阿Lam坦言個唱上將會演繹由1976年至2011年的經典金曲，合共接近五十首，但保證不會唱到超過十二點，問到35年來最難忘的事？他笑言：「咪跌落個窿度囉。（今次演唱會有冇窿？）都有，不過只要我知個窿喺邊，就冇問題。」

兒子在後台幫手

演唱會將邀請到當年唱《三人行》的詩詩及劉天蘭一齊再次合唱，但阿Lam沒有預太太葉蒨文（沙麗）：「沙麗留喺控制台啦，幫我睇啲音響、燈光咁樣。（咁你同佢啲合唱歌？）我自己啲歌都已經滿瀉喇，控制台呢個位置佢都鍾意做！」阿Lam表示兒子林德正（Alex）開始籌備自己的專輯，或會邀請Alex到後台幫手：「遲啲佢會開始錄音出碟，不過Alex性格好似我，做嘢好滋油，到時錄音可能幫佢聽吓囉，始終做嘢唔想兩父子扯咁埋。」

放大圖片	林德正同老爸阿Lam十足餅印。

爆沙麗最憎鬍鬚

提到阿Lam與兒子造型好似，阿Lam說：「係啦，我叫佢留鬚最緊要識執鬚，要修剪吓，沙麗成日都叫佢剃鬚，佢最憎鬍鬚，點知都係嫁咗個鬍鬚佬！依家連個仔都留埋鬚，激死佢。」

文：音樂組