余文樂型接機會成功非老馮
被封為新一代型男的余文樂入行十年，曾飽受負面新聞打擊，初時他十分介意，覺得有挫敗感，但明白不是每個藝人都可以在歡呼聲中成長。曾犯過錯的他，明白成功非僥倖，慶幸自己有機會翻身，珍惜手上所擁有的一切。
曾經犯錯有幸翻身
阿樂憑高大外形、俊朗外表，甫入行已迷倒不少女fans，出道至今工作不斷，但經常受負面新聞影響，曾令他非常沮喪……
入行就快十年，時間過得好快，依家唔會介意負面新聞，以前就介意！覺得好辛苦，做到少少成績，又因為呢啲負面新聞，返番去原地踏步，又扣咗分！就好似爬爬爬，又跌番落嚟，又再爬爬爬又跌，初時一定覺得好挫敗，覺得做嚟做去都做唔到，而自己又控制唔到，咁咪會忟、脾氣唔好囉！
依家番轉頭睇知係一個過程，因為呢啲事，會更加珍惜我依家擁有，唔會覺得係「老馮」，唔係必然嘅。呢個圈係要一步步，唔可以太過急進。我唔羨慕人哋快過我，我慢慢行，不知不覺會行到好遠，可能好多人已經喺你後面都唔定。女藝人青春可能比較緊要，但男藝人可能味道、經驗緊要啲。
其實我都算幸運，雖然負面新聞唔多，但以公司角度嚟講，唔係一個易做嘅藝人，因為易惹緋聞、負面報道，好容易令客戶卻步。但其實係好事定壞事呢？可能冇人講仲差！學大家所講，唔係個個可以喺歡呼聲中成長。每個人都有自己經歷，能夠跨過呢一步可以成功，但可能行差踏錯就玩完。我自己都犯過錯，幸好有機會可以翻身，繼續向前行。我依家慢慢去鍛煉情緒，學習去控制自己。
圈中筍盤憧憬結婚
今年廿九歲的阿樂，傳過緋聞的女星一隻手已數清，令人最深刻是他與鍾欣桐（阿嬌）及黃伊汶的緋聞。現時有樓又有車的他堪稱圈中「筍盤」，但原來感情路上已有兩年真空期……
合作過嘅女星好多，但緋聞我真係唔多，工作就工作，緋聞冇就冇，砌唔到你生豬肉。呢兩年真係冇拍拖，唔平衡梗係會啦（哈哈大笑）！依家冇出去玩，好少識到新朋友。早幾年仲係好奇，但知道個模式係點，去玩去飲，飲醉就嘔，返去就瞓覺，瞓醒就頭痛，又去開工之後又去飲，來來去去不外如是！飲醉又驚出事，擔心會唔會講錯說話，會唔會失禮嘔落人度。我試過出去玩完之後，有人問我：「你追阿邊個呀？」搞到我一頭霧水。出去玩就一定有是非，我唔係驚，而係依家工作完真係攰到懶得出去。
將來拍拖我都會公開，我冇乜所謂，呢個年代鍾意你嘅粉絲唔會介意你結婚，唔會話頂唔順崩潰，粉絲佢哋都結婚啦！人生唔係得工作，要有家庭、友情、愛情，去到咁上下年紀，結婚生小朋友擁有自己嘅家庭都係好正常。
接拍爛片磨練演技
接拍過四十多部電影的阿樂，雖然賣座及口碑好壞參半，但除了為他帶來豐厚身家，○八年更憑電影《第一誡》，與鄭伊健雙雙奪得韓國富川國際電影節最佳男主角，演技備受肯定……
我覺得自己係幸運一群，比上不足比下有餘。雖然未去到最top位置，但呢十年我都遇到幾部好嘅電影。我不得不多謝劉偉強，佢扶過我好幾次幫我好多，我要多謝佢。其實除咗佢，仲有葉偉信、吳宇森、彭浩翔、謝保瑞、郭子健等導演。演員係好被動，人哋覺得適合就會搵你。喺電影方面我嘅機會真係幾多，有段時間一年拍四、五部，有戲就拍，一有就接，因為我想打好根基。好似梁朝偉、周潤發都經歷過喺無綫不停拍劇嘅日子，希望熟能生巧，好嘅又接唔好嘅都接，要拍過唔好嘅先覺得咩叫好。
挑戰自己再戰樂壇
愛好挑戰的阿樂，寧願拍少幾部電影放棄搵錢機會，選擇在唱片業低迷環境下再戰樂壇。他說：「相隔五年再出唱片，我當正自己係新人重新開始。雖然電影成日話片酬吸引，但好多時唔係咁計，唔係吓吓用錢衡量，唱歌做得出色都搵到好多錢！你睇周杰倫做得好好，又搵到錢，證明永遠做得好嗰班依然生存到。」
早年專注電影工作的阿樂，認為有得必有失，不覺自己在樂壇的路崎嶇，只是起步比較慢：「近年唱片業陷於低迷，但我鍾意挑戰自己，既然決定咗，就要盡力試到底。今次出碟唔係要show off話畀人知我識唱歌、我唱得有幾好，係想表達另一面比較少見嘅我，將我開心會整蠱做怪嘅一面呈現畀大家睇，有朋友話我呢一面仲吸引！」
口述：余文樂
筆錄：薇美
攝：沈健程
服裝：ue@I.T
Hair：Ben YEUNG（Hair Corner@HK）
Makeup：Jenny TZIONG
場地：ELEMENTS