陳茵媺得寵拖篋掃名店
港姐陳茵媺（Aimee）雖被陳豪舊愛廖碧兒暗寸是「第三者」，不過心情顯然並未受損，前日出席活動過後到尖沙咀買性感Tube Dress迎夏日，期間瞥見記者更大方微笑任影。
陳茵媺（Aimee）最近被傳與圈中「筍盤」陳豪秘密撻着，更被對方舊愛廖碧兒指她是「小三」﹗眼見Aimee受辱，陳豪不敢怠慢返港即急急於電台開腔護花澄清，Aimee心情頓時靚晒﹗前日出席宣傳活動過後，即拖篋現身尖沙咀閒逛，雖然見沿途有記者在場，但她未有理會，更向鏡頭揮手微笑，相當識做。Aimee甫進名店後，便火速埋首選新夏季裙款，期間對一條白色Tube Dress裙大感興趣，於鏡前擺足Pose左試右試。可惜打量一番後似乎並不滿意，未幾在店員帶領下從秘道離開。
另外，Aimee昨晚出席跑馬地馬場舉行的女皇盃活動，她表示雖冇空看王子大婚，但大讚一對新人很甜蜜，更指王子是女士的dream man。至於緋聞男友陳豪是否其dream man，Aimee不置可否的說：「冇特別規定，總之最緊要相處舒服，性格好唔好。」她續說多謝傳媒常報道其緋聞而工作量增加。
否認同蕭正楠拍拖
Aimee再次否認跟蕭正楠拍拖，但問到會否介意和陳豪情侶檔合作，她說：「如果公司安排，唔會介意同同事一齊出嚟。（陳豪只係你同事？）係朋友。（如蕭正楠同陳豪追你揀邊個？）唔好問啦，陳豪係好好男人，畀啲時間我認識呢個朋友啦！」同場的名模Jocelyn和老公Anthony說雖冇睇王子大婚，但Anthony卻指着妻子笑說王子結婚令很多女士心碎。
文、攝﹕追蹤組