曹蕙蘭蜜會洪杰篤波飲奶
樂壇新人、曹敏莉妹妹曹蕙蘭（Mable）日前被發現與英皇歌手洪杰相約九龍灣桌球室「開波」，洪杰貼身教導初哥Mable，不時「出手」糾正對方姿勢，兩人表現甚有默契，女方成功入波後興奮與洪杰High Five，埋首篤波的她更獲對方體貼餵飲凍奶茶，兩人態度親暱，甜蜜十足熱戀情侶一樣！
兩人又轉到車場睇車，與汽車經紀密斟兼試坐心水名車。其後Mable拉洪杰行BB用品店，估計為快出世的姨甥仔買禮物，男方趁機耍冧招，戴上BB帽扮巨嬰，成功氹得Mable笑逐顏開！記者致電Mable查問兩人「戀情」，她笑着否認：「好朋友，知佢篤波叻所以切磋吓，（發展機會？）唔會啦，識咗咁多年，我鍾意大隻啲嘅男仔。」洪杰亦否認撻着Mable：「我哋似兄弟多啲，佢性格好男仔頭。」
