李亞男未想嫁 隔空拒祖藍
李亞男、羽翹及麥貝夷等前晚錄影《魔法擂台》，首次為該節目錄影的李亞男認為懂魔術的男生較吸引，但她不想男友王祖藍學一招半式，她謂：「佢多才藝得滯，我想自己學多啲！（學完變畀佢睇？）我會變畀朋友睇。」早前她與王祖藍幫鄺文珣湊B以致祖藍有結婚衝動，李亞男說：「我未ready，等我拎到獎先啦，幫人湊B可以體會吓做母親！」
第二次為節目錄影的羽翹自言喜歡魔術男：「上次節目有個AAA級嘅年輕魔術師喺微博同我傾偈，我叫佢下次表演刀鋸美人畀我睇，（你做美人？）佢話依家淨係識切開，未識黐番埋喎！」雖然她表示對該魔術男未至好感階段，但亦笑言：「識變魔術可以氹女仔，又係打開話題嘅好辦法！」
