「震」亂工作大計 三大o靚模縮沙 暫停攻日
日本大地震有港、台星無懼危險赴日打氣，但亦有不少名模的攻日大計受阻有變，已簽日本經理人公司的周秀娜，原定每個月都要飛日本最少一次開會及為當地時裝雜誌影相，其香港經理人Roy昨直認娜姐的日本工作預計要暫停三個月至半年︰「原本今個月要飛去影雜誌相、五月去日本出席品牌活動宣傳亦已取消，未來嘅日本工作要等當地公司通知，我哋盡力配合。」
本來計劃今年四月在日本為新碟宣傳的名模諸葛梓岐（Marie），亦承認因地震令計劃有變：「日本方面有問我幾時再去，但因訂晒去其他地方工作，暫時冇期。（損失幾多？）依家最重要係賑災，個人損失又算得係啲咩！暫時唔會去日本旅行，當地嘅物資咁緊張，唔好同人爭水爭食啦，捐錢幫佢哋仲好！」
至於親歷日本311巨震的Angelababy，原在當地拍攝廣告及為雜誌拍照亦全部叫停。不過本月她在日本已有新歌推出，工作開始逐步回復，其經理人Kim昨表示Baby在日本成績理想，一定會返日工作：「日本經理人方面做宣傳好好，暫毋須要Baby返日本宣傳新歌，Baby依家喺北京拍緊戲至五月初，之後應該會拍另一部戲，（返日無期？）咁又唔係，佢隨時會返日本，有廣告一樣會接，只係有啲工作可能成隊Team嚟香港遷就Baby。」