羽翹姿識宅女唔使老公養
眼見港女成行成市，港男無不嚇到急急腳掉頭走。不過自認宅女的羽翹，有學歷、懂打扮兼且絕無港女的刁蠻特質，絕對是圈中優質筍盤。直言婚後絕對唔會靠老公養的她，識得自食其力先係佢的最大賣點！
羽翹向來走「姿識分子」路線，入行四年來一直堅拒賣肉，她認為偶爾性感，當然有助吸引男士的目光，但絕對不是物色理想男友的辦法。羽翹笑指自己沒有本錢露，所以寧願「藏拙」。
自言是個浪漫女朋友的她表示，吸引男仔應該先抓住佢哋嘅心，其實男人都要人氹，間中給男友驚喜，佢哋就會好開心。
現時好多女仔都唔識煮飯，而羽翹自誇廚藝了得，糖醋骨、口水雞及牛扒都是羽翹的拿手小菜。她指自己為人比較傳統，喜歡與男友在家中撐枱腳，看見對方食得開心已經好滿足。
近年羽翹在網站介紹化妝及護膚，成為眾港女的「明燈」，她認為打扮對女生非常重要，不但女為悅己者容，而且女仔扮靚啲心情都會好啲，有助散發自然吸引力，令人更加想親近。
親自湊Ｂ最放心
羽翹更向眾姊妹們傳授成為男士眼中可愛女人的必殺技。一是有自理能力，原來羽翹睇波、認路、修理錄影機都難唔到她，表明婚後不再唱歌的她會選擇搞小生意，總之唔使令老公在經濟上擔心她。其次是要親自湊ＢＢ，以免ＢＢ畀外傭姐姐寵慣而冇規矩，始終自己湊先最放心。
羽翹眼中的「筍男」
身為優質盤的羽翹，談到圈中的理想筍盤男即滔滔不絕，大讚圈中男藝人又有才華又靚仔，她直言將來的伴侶要有責任感及愛家庭的好男人，加埋靚仔就無敵！
劉青雲
「佢向來都係我心中好男人首選，夠專一，多年來與太太都咁恩愛，而且係公認好戲之人，即係有才華啦，如果將來揀老公，都會以佢為人辦！」
張學友
「佢係好好先生兼老公，佢好錫屋企人，對太太同兩個女都咁好，男人最緊要有承擔同埋有責任心，加上唱歌好好聽，如果將來老公會唱情歌畀我聽，我實開心到暈！」
林峯
「佢咁紅，仲唔係筍盤？林峯真係好靚仔，對電眼好迷人，加埋唱得又跳得，簡直係完美啦，我平日睇電視劇，都係追住睇佢咋！」
Profile
中文名：羽翹
英文名：Ava
出生日期：1985年8月5日
年齡：25歲
身高：167厘米
三圍：32/24/34
文：盧坤穎 攝：謝國華
髮型：Jay Yeung@Hair Corner 服裝：Nice Fashion
場地：Billion Place