再活一次……陳偉霆：做狗好過做人

生命無Take Two，相信可以違反此定律者自古以來只有耶穌一人。復活節已到，大家不妨發揮想像，如果可以復活重生，最想做甚麼？藝人十居其九都說做番人好，不過，唯獨陳偉霆就認為做狗好過做人﹗

陳偉霆：「我想做我屋企嗰隻養咗十一年嘅狗Shasha，覺得佢好幸福，成日有得歎冷氣！我成日出去做嘢，佢就有得去公園玩，仲一日去散步三次，生活真係好寫意！」

身材弗爆的貝安琪原來是愛吃之人，她坦言最想成為意大利人，原因與食有關：「意大利嘅食物好好味，白酒、紅酒都好靚，做意大利人可以大飽口福。」

馬詩慧滿足現狀，毋須作任何改變，她稱：「無論做咩人都會有煩惱、開心或唔開心，我覺得自己做得幾好。雖然做女人好辛苦，要工作又要照顧老公同仔女，但我唔恨做男人，因為女人身份多，咁先更有樂趣。」

Mandy Lieu：「其實我唔信生命有Take Two，但如果真係有嘅話，我都係想做番自己，將以前自己做得唔夠好嘅地方，希望再做好啲。」

馬詩慧	Mandy Lieu

董敏莉向來視米高積遜為偶像，她稱有機會再活一次，渴望能成為這位超級巨星：「我覺得佢整個人同音樂連繫一齊，我好想做佢，感受吓呢種奇妙嘅感覺。」

如果可以再活一次，連詩雅希望成為黑人，她說：「因為黑人無論在音樂或舞蹈方面，都特別敏感，又有運動細胞，同我哋嘅文化好唔同，所以有機會真係想體驗吓。」

楊愛瑾想法最為天馬行空，她想成為的人竟是大人細路都喜歡的多啦A夢，她笑言：「我好想有個百寶袋，尤其是隨意門，無論去邊都好方便。」

郭秀雲不需要重生，她說：「人生好寶貴，自己好幸運，四肢健全，如果一定要我重生，我都會揀番做人，帶快樂畀朋友，為社會做到正面嘅影響。」

混血名模Amanda S.：「我想做太空人，因為我真係好想去太空，最想試吓喺月球上漫步，如果遲啲有上太空嘅旅行團，我一定參加。」

名模琦琦：「如果可以重生，我想將我嘅廣東話學好啲，令自己嘅表達更豐富。另外，雖然我都識講英文、德文同上海話，我仲想學多幾種語言，好似法文同意大利文。」