陳倩揚正能量胎教囝囝

江若琳（Elanne）與陳倩揚因拍劇成為好友，兩人交心談天，Elanne全程都對這位準媽咪投以羨慕眼光，因為倩揚擁有幸福的婚姻，談到對即將出世的小男嬰，準媽媽坦言最希望兒子發放正能量，樂於助人！Elanne還跟倩揚約定，將來嫁時要其囝囝做花仔。

江若琳（右）與陳倩揚因拍劇做了好朋友，並分享她將為人母的喜悅。

江：江若琳陳：陳倩揚

江：我同你認識係因為拍無綫劇《洪武三十二》，我仲知你為咗上鏡更靚，曾一杯飲料當飯吃。

陳：着古裝戲服要面尖才好看，惟有努力減肥令自己上鏡唔會變包包面。

江：嗰時我哋一齊開工，聽到你講男朋友嘅嘢，好甜蜜，拍完劇之後，就收到你結婚嘅消息，真係好開心，我知你嘅另一半好支持你！

陳：我同佢好多年感情，之前佢去咗外國讀書，分開咗一段時間，之後佢返嚟，大家嘅相處同初戀冇分別，因為當時大家會爭取時間見面，好似熱戀咁。

江：依家你哋仲有埋愛情結晶品添，就快做媽咪，心情如何？

陳：期待多過緊張，BB仲有三個月就出世，都有擔心自己準備好未；老公就成日跟肚中BB講故事，灌輸啲正能量畀佢，我就唱歌，BB都好似有反應，如果老公返嚟未得閒同佢傾偈，佢就會踢我，老公講故事畀佢聽，聽完老公叫佢踢一下，BB真係會踢，玩得好開心，佢好似真係聽到咁。

江：想BB似邊個？

陳：因為係男仔，想佢似爹哋咁頭腦靈活，不過，最緊要品性好，做一個樂於助人、有正能量嘅人。

江：你佗BB佗得好好，一啲都冇走樣，同以前一樣咁靚。

陳：你將來佗B，都一定係靚媽咪，第日你結婚行禮，我個仔就做花仔。

陳倩揚與夫婿有段刻骨銘心的愛情。

陳倩揚與江若琳約定，將來江出嫁時，囝囝會做她的花仔。

陳倩揚是○八年港姐亞軍（左），冠軍張舒雅（中），季軍馬賽。

想做就做瞞男友選美

江：你之前點解會去選港姐？係因為一時衝動，睇到宣傳片去選，定係朋友覺得你靚女，叫你去參加呢？

陳：一定唔係後者，其實我一直都好想試吓啲新嘢，選港姐有年齡限制，25歲後就唔可以參加，嗰年如果我唔參加嘅話，下年就冇機會，加上嗰年港姐去加勒比海外景，我覺得又可以學嘢，就同媽咪講，我想去報名，但就冇話畀男朋友聽。

江：男友知道時反應如何？

陳：有少少唔鍾意我冇話佢知。

江：佢會唔會抗拒你選美時要着泳裝？

陳：都唔係，佢曾經講過，男仔識香港小姐，就好開心，女友選香港小姐就唔好嘞，為咗呢件事，我同佢都有少少拗撬，但我之後用時間嚟證明，我只係想試一樣嘢，唔係唔安於現狀。

江：我對你有一種感覺，覺得你唔係好似呢一行嘅人，好單純，只會向着自己嘅目標去做，唔會同人去競爭。

陳：我覺得呢一行有好多唔同嘅崗位，如果想擁有全世界，負荷好重，好大壓力，我覺得做自己鍾意做嘅嘢，就已經好好。

江：我以前睇啲劇集講選美，會有批(月爭)、不和嘅情況，你選嗰屆有冇呢啲情況？

陳：冇，因為嗰時只得十二個女仔去選，仲要上郵輪，大家喺船上過咗十日，一齊生活感情好好，再加上嗰屆個個都唔同款，唔會有比較。

江：好記得你喺總決賽嗰晚，突然由短髮駁成長髮，令人眼前一亮，點解會有咁嘅改變？

陳：初入圍時，去髮型屋轉造型，髮型師覺得我可以試下短頭髮，之後，反應普通，但我冇特別唔開心，因為覺得頭髮會再長番，到總決賽時，髮型師想同我轉下形象，就幫我整咗個長頭髮，發覺長髮又另一種味道，每一樣嘢都有安排。

陳倩揚在港姐決賽夜，駁髮造型十分好看。

名花有主富豪卻步

江：好多嘢都真係注定，點解總決賽當晚你咁有信心，一啲都唔驚嘅？

陳：可能任職空姐，見得人多，而且想贏先會驚，我根本冇諗過輸贏，所以唔驚。

江：有唔少傳聞話啲富二代、有錢公子喜歡追港姐，有冇富豪追過你？你同老公未結婚之前，佢有冇擔心你會被搶走？

陳：佢有冇擔心我就唔知，但我入行至今，都冇富豪追過，真係冇，好似冇可能，但真係，可能因為我一早講咗我有固定男友，其實好多嘢都係睇自己點處理，好似去Ball咁，你say hi都可以有唔同語氣，人哋一定get到你嗰句hi只係禮貌式，定係嗲聲嗲氣hi完之後，下次可以攞電話。

做交換生打工洗廁所

江：我之前曾聽你講日文，非常流利，你係咪喺日本生活過？

陳：係，我大學二年級時，去過日本名古屋做交換生。

江：做交換生要邊做工邊讀書，都幾辛苦！

陳：係好辛苦，我記得當時我去咗一間意大利餐廳做兼職，嗰時啱啱二十歲，喺屋企都唔使做咁多家務，但去到日本打工，佢哋好分尊卑，由於我係最初級嘅，所以要洗廁所、掃地，加上餐廳用石頭嚟做薄餅嘅碟，我捧餐捧到手指要全部黐晒膠布，同媽咪講電話時，望見啲手指，有一刻覺得都唔知為乜，就喊咗出嚟，但其實嗰段經歷係好值得，令我講到流利日語，亦學到同人相處以及高EQ。