樂瞳掃低糖妹點暈宅男
宅男至愛均是細細粒少女，憑惡女角色上位的樂瞳，以迷人校服誘惑，加上疑似凸點，踢走糖妹成為新一任網絡女神！
身高5呎2吋的樂瞳最近憑新劇《點解阿Sir係阿Sir》人氣急升，飾演惡死女學生鍾家寶（中女）角色十分搶眼，校服Look更睇到宅男眼甘甘，令她除了在TVB網站登上人氣王之外，更成為新網絡女神，網上瘋傳其相片。
否認劇中凸點
樂瞳對於成為網絡女神大感驚喜，她說：「一直以為女神係高高瘦瘦好似林志玲，估唔到近排鍾意我同糖妹，可能係好耐冇校園劇，校服Look有新鮮感！」
問到會否怕宅男亂整意淫合成圖？她大方地說：「佢哋都係鍾意我啫！冇辦法架喇！愈叫佢哋唔做，反而會做多啲！」而最近流傳一幕她在劇集中的疑似凸點場面，不過重要位置偏低，令不少網友懷疑，樂瞳亦說：「冇可能，個位都唔啱，而且打咗好多底！不過證明套劇多人睇！」
踢爆腳粗唔開心
至於「上一代」女神、4呎8吋糖妹（Kandy）大方認為被取替是好事，並多謝樂瞳接力，因之前有不少網上討論令她不快：「唔係真嘅都冇所謂，但話我腳粗就講中咗！好心傷！仲有好多人踩我Partner阿峰（糖兄），唔開心！」
此外，糖兄妹昨日出席小露寶活動，糖兄透露兩人正減肥，現在他已減了20磅，目標再減10磅，糖妹則說：「我都想索啲架嘛！」
糖妹Kandy
年齡：22歲
身高：4呎8吋
往績：09年與糖兄組成糖兄妹，歌路正面健康，去年底狂掃樂壇新人獎。
必殺技：有「陳慧嫻接班人」之稱，形象活潑可愛，身形超細粒卻有巨肺，經常笑瞇瞇，以腰果眼笑容融化宅男心。
樂瞳Cilla
年齡：24歲
身高：5呎2吋
往績：主力在無綫拍劇，09年殺入樂壇奪得不少獎項，去年一曲《乾物女皇》變身甜美宅女，成功取悅男fans。
必殺技：天生一副娃娃臉，眼大大嘴細細，是宅男至愛類型，最近更施展校服誘惑晒白滑美腿。
文：影視組、音樂組