梁嘉琪遇差品男友即分手

以主持工作較多的梁嘉琪最近再次發功，接連有新劇出街，包括剛播完的《女拳》及正在播映的《洪武三十二》，嘉琪表示兩個角色截然不同，尤以《女拳》中的千金小姐有更多發揮，除了喊戲極多外，又慘遭姦污，結局更要掹刀殺掉壞蛋老公馬國明，她說：「呢個角色好深刻，我好鍾意個結局，心諗『有冇女人慘到咁？』我哋花咗好多時間拍，仲營造到最後我仲好愛馬國明，點知係我親手殺死佢，好多朋友話大快人心，希望觀眾會有驚喜！」

劇中馬國明壞事做盡，問到現實中可有遇過壞男友？嘉琪即自誇理性，若感覺對方人品不好便斬纜：「我會走得好快，唔會沉淪落去，好好彩我冇試過，希望到時我識抽身啦！」

最近密密工作的梁嘉琪，希望可在電視圈闖出名堂。

梁嘉琪多演柔弱角色，其實她外柔內剛可作不同嘗試。

演古裝有待進步

嘉琪在《洪》劇中飾演賢淑王后，首度演古裝的她，並不滿意效果說：「要顧住儀態同語調，未入到個角色，下次會演得更好！」而嘉琪正忙於拍攝《回到三國》，飾演「諸葛亮」林峯太太的她希望會有進步。

在過去數部電視劇中也演柔弱角色，問到會否想演奸角或女強人？嘉琪希望循序漸進：「即使係同一類角色，都可以有唔同演法，所以唔會太急，如果準備唔足，效果都未必好。」

文：影視組　攝：劉智源

髮型：Zell Leung@HH Salon

服裝：Heroic Rendezvous