陳嘉桓周圍捐搵食要求多
近日陳嘉桓（Rose）與林峯的緋聞傳得鬧哄哄，不過她日前懶理是非，與師兄杜宇航品嘗波士頓名菜，fit到爆的Rose坦言是「奄尖人」，閒時會約三五知己到平民區廟街歎煲仔飯，她說：「最喜歡捐窿捐罅搵嘢食！」
陳嘉桓（Rose）、杜宇航日前應DJ好友林柏希主持的節目《還看今天》邀請到波士頓餐廳歎名菜，Rose坦言是個揀飲擇食的人：「生嘢、內臟唔食，所以好少食日本菜，最鍾意食甜品。」問到緋聞男友林峯有否約她撐枱腳？Rose說：「冇請食飯，之前喺台灣拍MV就試過大班人食飯。」
杜宇航唔揀擇
Rose透露最愛捐窿捐罅搵美食，問到不怕遭食客認出？她說：「唔怕，藝人都係人，當然會顧及形象，好多時都會同班朋友去廟街食煲仔飯。」笑容甜美的她坦言最愛食甜品：「相信好多女仔都鍾意食，（唔怕肥？）最緊要健康。」而杜宇航笑言背脊向天都會食，他說：「我咩都食，始終我哋運動量大。」
林柏希求新鮮
主持人林柏希表示曾與太太花上6,000元歎名菜：「食完唔覺得好食同飽，以前會諗去邊度食飯慶祝，依家會實際啲，最緊要好食，打邊爐都得。」他又自爆相約太太食飯感壓力：「真係上網搵食，唔想帶佢去食過嘅地方再食，所以都幾頭痛。」
林柏希髮型：Keith＠Xenter
陳嘉桓、杜宇航髮型：Patrick＠HH Salon
場地：The Bostonian＠朗廷酒店
文：音樂組 攝：司徒國榮