甄詠珊勇敢單飛
前Freeze成員甄詠珊（Carisa）離開組合後，選擇獨立向戲劇發展，她回味昔日跟姊妹們共處的日子，三人大被共眠、爭廁所、食冷飯的日子，百般滋味在心頭。
Carisa離開Freeze後作獨立發展，她率先將中文名的「穎」字改成「詠」，希望事業有如簽名一樣順順利利。「分家」後，Carisa初嘗填詞工作，寫好一首《完美咖啡》送給自己：「愛情就好似咖啡咁，一定要趁熱飲，放耐咗就會變酸，係想表達愛要及時呢個訊息。」她坦言歌詞是自己的一份感觸，原來Freeze有位好友因情緒問題而自殺離世，她說：「初出道全香港人都睇唔起Freeze，係得佢一個肯盡心盡力咁幫我哋，教我建立自信，後來佢離職後一直好忙冇機會問候佢，突然收到佢離世嘅消息，我好自責，可能我早啲打，個結局唔會係咁。」Carisa坦言會努力將廣東話讀得準，努力工作，希望友人在天之靈看到她的好成績。
回味Freeze爭廁所
提到Freeze三位成員各散東西發展，Carisa說：「其實都有少少心噏呀，始終三個人一齊會熱鬧好多，以前出trip我哋三個人一間房，成日爭廁所，夜晚肚餓冇嘢食，見到盒之前食剩嘅飯，會諗方法去叮熱佢一齊食，諗起都好開心，依家一個人都幾孤獨！」
將與鮑姐演舞台劇
另外，Carisa首次參演的舞台劇《秒速18米》將於4月22至24日正式公演，她坦言跟金像獎影后級人馬鮑起靜同台心情特別緊張：「其實為呢個舞台劇都推咗幾個內地登台騷，今次係個好寶貴嘅經驗，淨係睇鮑姐排戲已獲益良多，我冇諗過幾錢酬勞就答應！」
採訪：卓藍