甄子丹停產半年享天倫
近年長駐內地發展的甄子丹，與家人聚少離多，即使有一天假期，也不惜遊飛機河返港享天倫，子丹惟恐錯過陪伴子女成長，「宇宙最強」決定重返地球，打後半年將會減產陪伴家人。
打從年前的《葉問》起，子丹火速成為影壇搶手貨，片約一部接一部，酬勞自然幾級跳，早前他接拍古裝片《關雲長》，飾演靈魂人物「關公」，子丹透露基於大眾對這位歷史人物的認知很深，但《三國誌》卻只有十多行描述這位人物，擔心演繹時未能達到預期效果，再加上是古裝片，於種種原因下曾想過推卻，不過最後也被導演麥兆輝及莊文強誠意打動。
拍姜文獲益不淺
鑑於《葉》片角色令觀眾留下深刻印象，故子丹於演繹「關公」前，要先撇下葉問的影子，從走路及眼神，繼而黐鬚來進入角色狀態，壓力非常大，他謂：「嗰排成日都瞓唔到，會諗演得好唔好，再加上對手係姜文，好容易畀佢搶戲，不過真係好犀利，實在令我得益不淺。」
每當遇到壓力即將爆發時，子丹便自我找方法釋放，拿起一對仔女的照片細看，便會心情轉佳，他說：「睇完啲相就會笑番，自然開懷咗！我真係好掛住，有時得一日時間，就算來回飛機大半日，見得嗰一陣都飛返去，雖然係攰但係值得嘅。」
兩星期推3部戲
子丹深明錢永遠賺不到盡頭的道理，與其經常與家人分開，倒不如減少工作量，他謂：「成日飛來飛去，太太就明啫！對仔女就會有投訴，所以打後大半年好想休息，多啲時間陪佢哋，又可以鑽研武術上更高境界，好似呢兩星期就都推咗3部戲。（會唔會再生小朋友？）順其自然，其實我都知道太太依家好辛苦。」
文：影視組
攝影：李廣成
髮型：Kelvin Koo @ HAIR
化妝：Omix B