藝人北上未受影響

李彩華：冇被勉強

憑《回家的誘惑》而在內地人氣飆升的李彩華，表示在內地工作多年，自己幸運地從不被要求作不必要的應酬﹕「我返內地唱歌就淨係唱歌，拍劇就淨係拍劇，不過我知道內地應酬係少不免嘅，只係我比較幸運，冇畀人勉強過，身邊亦冇呢類（吸毒）嘅朋友。」

翁虹：生活正常

已移居北京的翁虹表示：「我啱啱忙完兩個劇返番北京，聽到呢個消息都好難置信，兩個幾月前仲見過莫少聰，佢畀我感覺好健康，孫興就好耐冇聯絡。（會到拘留所探望？）我諗現階段唔方便，自己仲了解件事，不過，今次係個別事件，唔覺對喺北京工作嘅香港藝人有影響。」提及在當地拍劇是否需要應酬時，她即說：「我就唔需要喇，最多係劇組約埋一齊食餐飯，況且，我出咗名唔煙、唔酒、唔夜蒲，生活好正常。」

放大圖片

放大圖片

張衞健：拒為拍戲而應酬

張衞健：「我行走江湖咁多年，好多人叫我飲酒，呢個係飯局文化，叫我食嗰啲（大麻）就未試過，有都會直接拒絕，如果非要應酬才有戲拍，就唔好搵我！就算飲酒我99%時間都會拒絕，唔係驚人喺酒裏面落嘢，只係自己酒量唔好，飲兩杯啤酒都嘔。」

譚耀文：保持理智

近年常返內地工作的譚耀文表示，香港藝人要北上發展，其實會感到十分辛苦：「要適應佢哋嘅應酬文化，例如要飲酒先係兄弟，不過呢次相信係個別例子，唔應該對整個娛圈『一竹竿打一船人』。」他又承認藝人很有機會被不法分子利用，故他經常提醒自己要潔身自愛，保持理智。