霆鋒有排食四哥黐餐
出爐影帝謝霆鋒連日忙於慶功，前日與逾20好友飯聚慶祝，謝賢未知是否想減輕拉姑醋意，竟自稱「路過」才出席飯局，而乖新抱栢芝亦十分識做，表示待拉姑回港後才「正正式式」再食一餐。
年僅30歲的霆鋒榮升金像影帝，一班好友比他更興奮，前晚已急不及待相約於灣仔飯聚慶祝，蘇永康、梁漢文、何超儀、葉佩雯、郭偉亮、李璨琛等逾二十好友紛紛現身，主人家霆鋒與栢芝則前後腳抵埗。
大班好友狂歡至深夜才散去，離開時栢芝不想搶老公風頭，刻意躲在霆鋒身後，且急步登車，留下霆鋒逐一與好友們擁抱道別，事後各人紛紛在微博上載飯聚照，「影帝爸爸」謝賢（四哥）亦現身與一班年輕人混在一起！
栢芝食多餐氹拉姑
霆鋒得獎後，有指因台上未有道謝媽媽狄波拉，因而令拉姑打翻醋埕，昨晚四哥更是慶功宴上的座上客，拉姑的心噏或會再一步升級，不過栢芝則相當識做，透過助手在微博留言，指待奶奶由內地返港，一家人會正正式式再食一餐。記者昨致電四哥，他為了「補鑊」更戲言謂：「邊係霆鋒請我，我啱啱約咗朋友喺隔籬，聽到附近點解把聲咁熟，咪走過去睇吓囉，好彩新抱（栢芝）識做叫我坐低，如果唔係我連位都冇得坐呀。（你講笑？）我做乜呃你？」
問到四哥會否因此而生霆鋒氣，他笑說：「嬲乜？咁佢哋年輕人世界嘛，況且佢之前都捧到我上天嘞。（拉姑嬲喎。）唓！佢喺我手掌十幾年，咩脾性我唔知？佢邊係嬲，只要傳媒唔好再『撩嘢講』就得嘞！（等拉姑返嚟再食飯？）我諗會啩！」而栢芝則較老公更見興奮，接受電話訪問時不諱言希望老公事業更上一層樓，日後可憑自己的製作公司，向奧斯卡最佳剪接或幕後製作獎項目標進發。
否認泰國拜佛求獎
談到昨有報道指栢芝在金像獎前，曾到泰國拜四面佛為老公「求獎」，她透過經理人回覆說：「佢哋一家又唔係第一次去泰國，乜嘢都有人傳；就算栢芝澄清咗冇BB，今日都仲有網民喺度質疑，根據佢哋嘅推測栢芝懷咗B女，咁起碼都四個月啦，仲唔見肚？」而有電視台特意訂造了一個朱古力金像獎送予Lucas及Quintus，原本栢芝想二人拿着拍照留念，想不到兩兄弟第一時間一個咬獎頭、一個咬獎尾，十分搞笑。
文：影視組 攝：追蹤組