馬瑙high爆扭興錢國偉
升呢做電影導演的錢國偉前晚拖男帶女到蘭桂坊夜蒲，只見她對陳靜（DaDa）及混血Model馬瑙最嗒糖！場內馬瑙High爆在錢國偉身旁喪扭，冧得他拖實對方離場。
由電視台監製變電影導演的錢國偉，前晚帶同新片演員到蘭桂坊「考察」，包括陳靜（DaDa）、馬瑙、楊愛瑾（Miki）、連詩雅、 陳柏宇、「萬寧哥哥」沈志明及模特兒許穎（Phoebe）。場內所見，未知是否尚未混熟，眾人均表現拘謹，多留在座上傾談，最多也只是猜枚飲酒，其後錢國偉逐一與演員分享夜蒲心得，而他似乎對DaDa及馬瑙最寵愛，主動與DaDa把酒傾談，至於混血兒馬瑙則風騷地隨音樂在錢國偉身旁喪扭，男方顯得十分受落，其後馬瑙先走，錢國偉亦拖着其手送她離開。
Miki陷三角戀
而錢國偉入場時承認是與新片《喜愛夜蒲》的演員到夜店感受氣氛，他說：「有啲演員都未蒲過，帶佢哋嚟見識吓囉！套戲好似以前部《晚９朝５》咁，但唔係三級，係二級半，希望唔做露肉都做到特別嘅感覺。（會加親身經歷？）唔多唔少都有。」
大騷長腿的Miki表示於片中陷三角戀，並要色誘「萬寧哥哥」，問到是否有性感演出？她說：「未知，應該唔輪到我，我都唔識勾引人，會返屋企對鏡練習，希望做到有矜持唔cheap！（有冇做過第三者？）冇，但試過畀人隱瞞。」
陳柏宇想溝女
至於陳柏宇則十分搞笑，忸怩不肯說為何現身蘭桂坊，並笑言是來「溝女」，他說：「其實有拖拍就唔使嚟，溝到又唔使再返嚟啦！（試過被溝？）邊個唔想！但冇囉！」
文：影視組