莫少聰涉毒新片或被飛起
近年轉至內地發展的男演員莫少聰和孫興，日前在內地涉嫌藏毒被捕，負面消息傳出，聰仔星途受到影響，原本8月參與電影《光輝歲月》有可能因此換人，昨據監製熊欣欣稱換人一事要開會決定。圈中好友吳啟華、張國強等人亦表示非常震驚。
莫少聰在內地涉嫌藏毒被捕，消息一出即影響其工作，原本8月參與的電影《光輝歲月》隨時被飛起。據知聰仔與《光》片商已談好只欠正式簽約，監製熊欣欣指今日會到北京開會，議決聰仔一角會否換人：「我聽到呢件事好Shock（震驚），之前同佢喺北京開會食飯都唔覺佢係咁！」而該片製片人韓欣利亦稱，曾與聰仔在橫店拍戲，對方即使收工晚，都堅持跑步鍛煉身體，並坦言聰仔涉毒屬實將考慮換角。
KK感驚訝
由於聰仔和孫興曾經在香港影視圈廣結良朋，包括曾志偉、吳啟華、張國強（KK）和何家勁等，各人聞莫、孫二人在內地涉毒被捕均表驚訝，其中KK稱與聰仔同屬「明星足球隊」成員，認為對方生活健康；阿勁稱會了解事件，並透露聰仔與KK、啟華跑馬拉松和打高爾夫球，不明他為何會陷入陋習。
突然好酒量
至於啟華昨日坦言前晚已得知這消息，擔心聰仔為此留案底，同時亦質疑孫興：「我唔信聰仔有不良習慣，佢係虔誠佛教徒，早前玉樹（地震）賑災又去西藏行善，我都有捐錢支持佢，如果今次留案底話會好麻煩，我都好擔心，希望可以幫到佢！（成日一齊飲酒？）近年見佢比前飲得，不過內地嘅酒局、飯局都好多陷阱，有時朋友太多都識唔晒，人哋畀啲唔知乜嘢你食或者飲，都好易出事，今次我信聰仔絕對係貪玩，可能人哋畀佢食啫！（同孫興都熟？）以前喺亞視合作過《還看今朝》，最近喺北京一個活動上見過一次，唔算好熟。」
志偉讚健康
而曾志偉昨稱中午才知事件：「唔知詳情，唔方便講任何嘢，但非常關心，聰仔同黃日華、苗僑偉等都非常老友，（聰仔平時有乜嗜好？）冇，佢好fit好健康又跑步，（佢喺邊度畀人拉？）唔知，有話屋企有話夜總會，（會否聯絡佢？）搵唔到，有喺微博留言但冇回應。」至於老友陳雅倫昨亦表示不信聰仔涉毒是事實，但替他擔心，而昨日她則在微博呼籲：「我們大家一齊支持他！」
文：影視組