陳法蓉自爆遭第三者打散
曾和不少公子哥兒拍拖的陳法蓉，前晚自爆共收過三隻求婚戒指，但最後因性格不合或有第三者而未能共諧連理。而同場的名模姚予晴則力撐早前和薛芷倫翹手夜蒲的男友曾智超，笑言對方如打茄輪，就會藤條炆豬肉。
前晚超級品牌CHANEL於中環舉行《CHANEL 2011高級珠寶展開幕酒會》，由名模Amanda S.及姚予晴演繹以羽毛為主題的「PLUMES DE CHANEL」系列珠寶，城中不少名人包括邱李茂琪、翁嘉穗及葉梁美蘭等均前來欣賞。嘉賓之一的陳法蓉更以Deep V裙性感上陣，艷壓全場！
共收三隻求婚戒
陳法蓉表示首次收到最名貴的鑽飾，就是廿年前當選港姐冠軍時，獲贈三件共值過百萬元的珠寶，雖曾拿部分去「格價」，但仍不 捨得賣出。不過，陳法蓉卻忽然自爆曾收過三隻求婚戒指：「係三個唔同嘅人送，雖然最後結唔成，但對方都冇收番。（其中一個係姓許（許晉亨）？）呢啲唔講，總之收到係好開心，唔係大小問題，而係有人求婚。（三次都散係有第三者或性格不合？）兩樣都有。（收咗結唔成唔吉利？）都唔會，人哋話收花球會結婚，三年前執咗蔡少芬個花球都未結！執到開心咪算囉，我指係花球！」
姚予晴藤條侍候
另外，對於男友曾智超早前被本報拍得和薛芷倫翹手夜蒲，姚予晴指男友現從事投資，故比前較多去應酬，更大讚對方扶薛芷倫落樓梯是紳士風度，她笑說：「如果攬晒或打茄輪，我就會藤條炆豬肉！（罰得輕？）都要畀人改過自新機會，我知呢啲嘢唔會發生。出去一晚就被人影到，香港做賊真係唔易做。（同男友約法三章？）普通應酬唔會打茄輪，（男友出賣肉體？）絕對唔會！」
文：名人組