發哥曼玉熱膺至尊帝后
「我冇做影帝好耐喇！」借用《英雄本色》一句經典對白，在過往二十九屆香港電影金像獎中，產生過三十位影帝，三屆影帝周潤發對上一次封帝雖已是二十一年前，但仍能力壓五屆影帝梁朝偉，在本報邀請數十位藝人票選中榮膺「影帝中的影帝」，與「影后中的影后」張曼玉，閃耀整整三十年。
發哥在金像獎歷史中，雖然只在第六、七、九屆三度染指「最佳男主角」，在數量上被後起之秀五奪影帝的梁朝偉拋離，然而，發哥只用了四年便三奪影帝，比偉仔要用六年才能望其項背，更具效率。再者，發哥於1995年起赴荷里活發展，自此可說幾乎絕迹香港電影金像獎，而偉仔開齋奪影帝正正就是95年，發哥轉戰荷里活，可謂間接造就偉仔一枝獨秀的時代。
甄子丹五體投地
「宇宙最強」甄子丹也對發哥佩服得五體投地：「發哥戲好，成功塑造角色，最重要係令觀眾入心，求其一部發哥嘅戲都鍾意，好似《英雄本色》佢啲經典對白，到今時今日都記得。」
夏文汐與周潤發曾合作多次，她說：「佢嘅專業態度令我難忘，佢攞影帝嗰幾套戲大家都識讚，但我哋本身做演員就知，發哥當年去荷里活拍《安娜與國王》，可以克服語言困難，將角色發揮得咁好，係好唔簡單嘅一件事，佢係名副其實嘅優秀演員。」
劉嘉玲推崇曼玉
梁朝偉雖然在票選中敗給發哥，但正如劉嘉玲所言：「梁朝偉係可以代表到香港嘅男演員，我唔係賣花讚花香，佢真係幾優秀。」對於「影后中的影后」，嘉玲不避嫌投下神聖一票，她說：「我會揀張曼玉，佢攞咗五次金像獎影后，如果唔揀佢，揀邊個？」
靚靚揀番自己
本身貴為影后的袁詠儀（靚靚）則說：「我想揀晒《新不了情》同《金枝玉葉》入面嘅袁詠儀做『影后中的影后』。如果唔畀自己揀自己，我就揀《甜蜜蜜》嘅張曼玉，佢喺套戲嘅演出真係恰到好處。」
文：影視組